Presidenti i Türkiyes, Recep Tayyip Erdoğan, tha se besimi në stabilitetin ekonomik të vendit të tij është forcuar pas zgjedhjeve presidenciale të majit.
"Ne jemi të kënaqur të vërejmë se besimi në stabilitetin ekonomik të vendit tonë është forcuar pas zgjedhjeve", tha presidenti turk në fjalimin e tij në një ngjarje të organizuar nga Këshilli i Biznesit Türkiye-ShBA në New York.
Duke theksuar kontributet e konsiderueshme të qarqeve të biznesit turk në ekonominë amerikane, presidenti Erdoğan vuri në dukje se investimet e drejtpërdrejta të kompanive turke në ShBA kanë arritur në rreth 8,6 miliardë dollarë gjatë dekadës së fundit.
"Ne do t'i rrisim reciprokisht këto shifra investimesh me përpjekjet e përfaqësuesve të biznesit", shtoi ai.
Erdoğan tha se Türkiye është e përqendruar në krijimin e një "klime të qëndrueshme të rritjes" nëpërmjet politikave që i japin përparësi investimeve, punësimit, prodhimit dhe eksporteve.
Duke folur për programin afatmesëm të vendit, presidenti Erdoğan tha se Türkiye synon "të eliminojë faktorët që rrisin inflacionin duke aplikuar mjetet e politikave fiskale dhe të të ardhurave, pa kompromentuar rritjen ekonomike".
Duke theksuar aleancën e gjatë midis Türkiyes dhe ShBA-së në kuadrin e NATO-s, ai shprehu dëshirën e Türkiyes për të rritur dhe mbështetur këtë partneritet, për të cilin tha se luan një rol vendimtar në garantimin e sigurisë, paqes dhe stabilitetit në rajonin euroatlantik.
"Angazhimet tona ekonomike dhe tregtare me ShBA-në përbëjnë një aspekt jetik të lidhjeve tona dypalëshe. Gjatë dekadës së fundit, vëllimi ynë i tregtisë dypalëshe është rritur me 1,5 herë", tha Erdoğan.
Presidenti turk tha se ShBA-të u bë destinacioni i dytë më i madh për eksportet turke dhe burimi i pestë më i madh i importeve.
"Deri në fund të vitit 2022, vëllimi ynë i tregtisë dypalëshe kishte tejkaluar 32 miliardë dollarë", tha ai, duke përsëritur objektivin për të arritur në 100 miliardë dollarë.
"Teksa forcojmë lidhjet tona politike me Amerikën, duhet të zgjerojmë dhe diversifikojmë bashkëpunimin tonë në sferën ekonomike", shtoi ai.
Presidenti shprehu gjithashtu shpresën e tij për të zgjidhur çështjet që rrjedhin nga veprimet e njëanshme si vendosja e tarifave shtesë doganore në sektorët e çelikut dhe aluminit nga ShBA-ja.
"Gjithashtu, presim që pengesat në zhvillimin e bashkëpunimit tonë në fushën e industrisë së mbrojtjes të eliminohen sa më shpejt të jetë e mundur", shtoi ai.
