Presidenti turk Recep Tayyip Erdoğan njoftoi të martën manifestin e Partisë për Drejtësi dhe Zhvillim (AK Partisë) përpara zgjedhjeve presidenciale dhe parlamentare të 14 majit.
Duke folur në kryeqytetin Ankara, Erdoğan, gjithashtu kryetar i AK Partisë, zbuloi një manifest elektoral prej 23 pikash, i cili së pari fokusohet në hapat për shërimin e plagëve nga tërmetet e 6 shkurtit në jugun e Türkiyes.
“Çdo sulm, çdo fatkeqësi, çdo dhimbje që përjetojmë, veçanërisht tërmetet e 6 shkurtit, tregon se duhet të forcojmë unitetin tonë, të mbrojmë më shumë unitetin tonë dhe të forcojmë edhe më shumë vëllazërinë tonë”, tha Erdoğan.
Presidenti turk tha se Türkiye do të rindërtojë qytetet në 11 provincat e prekura nga tërmeti dhe do të fshijë gjurmët e katastrofës që mori më shumë se 50.000 jetë.
“Ne do të shërojmë plotësisht plagët e shkaktuara nga fatkeqësia në 11 provinca dhe qytetet fqinje të tyre duke ndërtuar gjithsej 650.000 shtëpi të reja, 319.000 prej të cilave do të dorëzohen brenda një viti”, shtoi presidenti.
Erdoğan u zotua për ngritjen e Türkiyes në periudhën e ardhshme.
“Türkiye nuk ka zgjidhje tjetër veçse të jetë e fortë, të qëndrojë e fortë dhe të rrisë fuqinë e saj në mënyrë që të mos bjerë përsëri në gropën e skllavërisë politike dhe ekonomike”, tha Erdoğan.
Manifesti përfshin gjithashtu fushat e ekonomisë, mjedisit, familjes, drejtësisë dhe lirive.
Duke iu kthyer ekonomisë, Erdoğan tha se Türkiye synon të ulë inflacionin në një shifër.
“Ne do të rrisim nivelin e mirëqenies së punonjësve tanë, nga nëpunësit civilë te pensionistët dhe punëtorët, duke rritur gjithmonë pagat e tyre mbi inflacionin”, u shpreh presidenti turk.
Ai tha gjithashtu se Türkiye do të vazhdojë me investimet, prodhimin dhe eksportet deri në arritjen e objektivit për të çuar vëllimin e saj të tregtisë së jashtme në 1 trilion dollarë.
