Mbi 20.000 sirianë janë kthyer në vendin e tyre përtej kufirit pas tërmeteve të fundit në rajonin jugor të Türkiyes, tha të martën ministri turk i mbrojtjes kombëtare.
Duke folur me gazetarët në provincën jugore të Hatay, Hulusi Akar, hodhi poshtë pretendimet se ka pasur një fluks refugjatësh sirianë në Türkiye nëpërmjet kufirit të saj jugor, duke i quajtur ato "absolutisht të pavërteta".
"Qytetarët sirianë që jetojnë në Türkiye po kthehen në tokën e tyre për shkak të humbjes së shtëpive dhe të afërmve të tyre. Ka qytetarë sirianë që kthehen në atdheun e tyre nga Türkiye në Siri në një drejtim. Aktualisht kjo shifër ka kaluar 20 mijë", tha ai.
Më 6 shkurt, dy tërmete të fuqishme goditën Türkiyen jugore.
Lëkundjet me magnitudë 7,7 dhe 7,6 u përqendruan në Kahramanmaraş dhe tronditën 10 provinca të tjera - Hatay, Gaziantep, Adiyaman, Malatya, Adana, Diyarbakir, Kilis, Osmaniye, Sanliurfa dhe Elazig.
Rreth 13.5 milionë njerëz janë prekur nga tërmetet shkatërruese.
Disa vende në rajon, përfshirë Sirinë dhe Libanin, gjithashtu ndien dridhjet që goditën në më pak se 10 orë.
Lëkundjet e forta kanë shkaktuar shkatërrime dhe viktima të shumta në Siri.
Më shumë se 41.000 njerëz humbën jetën në Türkiye nga tërmetet e njëpasnjëshme, sipas shifrave të fundit zyrtare, ndërsa mijëra të tjerë u lënduan.
Türkiye lëshoi një alarm të nivelit 4, duke kërkuar ndihmë ndërkombëtare.
