Detyrat e ushtarëve turq në Siri nuk kanë përfunduar dhe vazhdojnë ende, tha të enjten Ministria e Mbrojtjes Kombëtare, duke iu drejtuar operacioneve turke kundër terrorizmit në rajonet kufitare.
“Në varësi të nevojës, mund të merret në konsideratë ridislokimi i trupave tona në Siri ose caktimi i tyre në rajone të ndryshme,” tha ministria në X.
Në veri të Sirisë, Türkiye ka kryer një sërë operacionesh të suksesshme antiterror që nga viti 2016, duke përfshirë Mburojën e Eufratit (2016), Degën e Ullirit (2018) dhe Burimin e Paqes (2019), për ta parandaluar krijimin e një korridori terrorist dhe për të siguruar paqe banorëve vendas.
Zyrtarët turq kanë theksuar se ata nuk do të lejojnë grupet terroriste të shfrytëzojnë ndonjë boshllëk pushteti në Sirinë e pas Asadit, por duhet të dorëzojnë armët dhe të shpërbëhen.
Për më tepër, zëdhënësi i ministrisë, z. Zeki Akturk, u tha gazetarëve gjatë një konferencë javore në kryeqytetin Ankara: “Me operacione të pandërprera dhe të suksesshme të kryera kundër kërcënimeve dhe rreziqeve, veçanërisht grupeve terroriste PKK/PYD/YPG/SDF dhe ISIS (Daesh), 69 terroristët janë neutralizuar javën e kaluar dhe gjithsej 221 terroristë janë neutralizuar që nga 1 janari, duke përfshirë 64 në Irakun verior dhe 157 në veri të Sirisë.
“Duke vazhduar çmontimin e strehimoreve terroriste, Forcat e Armatosura Turke kapën një sasi të madhe armësh, municionesh dhe furnizimesh në shpellat që u përkisnin terroristëve në zonën e Operacionit Claw-Lock në Irakun verior,” tha ai.
Ai shtoi: “Për më tepër, këtë javë, një terrorist i PKK-së i cili iku nga strehimoret në Irakun verior u dorëzua në postën tonë kufitare në Cizre/Sirnak”.
Lufta e Forcave të Armatosura Turke kundër terrorizmit do të vazhdojë me vendosmëri derisa të mos mbetet asnjë terrorist i vetëm”, nënvizoi Akturk.
Për masat e kontrollit kufitar, ai tha:
"Që nga 1 janari, numri i personave të kapur në tentativë për ta kaluar ilegalisht kufirin tonë ka shkuar në 320. Vetëm gjatë javës së kaluar janë penguar të kalojnë 1.496 persona, duke e çuar numrin e individëve të ndalur për këtë vit në 5.130.”
Terroristët e PKK-së shpesh fshihen në Irakun verior për të komplotuar sulme ndërkufitare në Türkiye.
Türkiye në vitin 2022 nisi operacionin Claw-Lock për t'i shënjestruar strehët e grupit terrorist në rajonet Metina, Zap dhe Avasin-Basyan të Irakut verior.
Autoritetet turke përdorin termin "neutralizoj" për të nënkuptuar se terroristët në fjalë u dorëzuan, u vranë ose kapën.
PKK-ja, e cila ka zhvilluar një fushatë terroriste 40-vjeçare kundër Türkiyes,, është klasifikuar si një organizatë terroriste nga Türkiye, ShBA-ja dhe BE-ja. YPG-ja – e cila ndonjëherë përdor emrat PYD ose SDF – është dega siriane e PKK-së.
Në vitet e fundit, duke përfshirë që nga rënia e regjimit të Asadit muajin e kaluar, PKK/YPG-ja është përpjekur të shfrytëzojë paqëndrueshmërinë rajonale për të krijuar një "korridor terrorist" përgjatë kufirit me Türkiyen.
