Në vetëm dy dekada, Türkiye ka bërë përparime të rëndësishme në industrinë e saj të mbrojtjes, duke reduktuar varësinë e saj nga jashtë nga 80% në 20%, tha presidenti i Türkiyes, Recep Tayyip Erdoğan, në ceremoninë e dorëzimit të tankeve të reja Altay në Forcat e Armatosura Turke për teste në provincën veriperëndimore Sakarya.
Ai theksoi qëllimin e Türkiyes për të qenë "plotësisht e pavarur në industrinë e mbrojtjes".
“Ne kemi reduktuar varësinë e huaj në industrinë e mbrojtjes nga rreth 80% në rreth 20% në një kohë kaq të shkurtër sa 20 vjet. Numri i projekteve të mbrojtjes, i cili ishte vetëm 62 në vitin 2002, sot ka kaluar 750”, tha Erdoğan.
Udhëheqësi turk tha gjithashtu se buxheti total i Türkiyes për projektet e mbrojtjes ishte 5,5 miliardë dollarë në 2002, kurse tani ai ka arritur një vëllim projekti prej 75 miliardë dollarësh, duke përfshirë ato në procesin e tenderimit.
Erdoğan theksoi se pas çdo produkti të zhvilluar në industrinë e mbrojtjes fshihen përpjekjet shumëvjeçare, durimi, puna dhe fuqia financiare.
“Kjo është mënyra se si secili prej UCAV-ve tanë (mjete ajrore luftarake pa pilot) -- të cilat dallohen sot në gjithë botën -- dhe mjetet tona të blinduara tokësore, anijet luftarake, fregatat dhe raketat, si dhe sistemet e tjera, të cilat janë shumë të admiruara, janë shfaqur”, shtoi ai.
Türkiye është bërë një vend furnizues për industrinë e mbrojtjes, me produktet e saj të përdorura nga shumë ushtri, nënvizoi mes të tjerash presidenti Erdoğan.
