Türkiye do të ndihmojë në trajnimin e personelit të sigurisë së Zambisë për të luftuar në disa fusha kritike, tha ambasadori i Türkiyes në këtë vend të Afrikës Jugore.
"Ambasadori i Türkiye-s në Zambi, Hüseyin Dicle, shprehu angazhimin e vendit të tij për të ndihmuar në trajnimin e personelit të sigurisë së Zambisë për të luftuar krimet e ndryshme, përfshirë pastrimin e parave, financimin e terrorizmit dhe krimin kibernetik," thuhej në një deklaratë të lëshuar nga Ambasada e Türkiyes në Lusaka dhe autoritetet e Zambisë të premten në mbrëmje, pas takimit të Dicle me ministrin e Punëve të Brendshme dhe Sigurisë së Brendshme të Zambisë, Jack Mwiimbu.
Dicle tha se shumë kompani nga Türkiye janë të gatshme të vijnë dhe të krijojnë biznese në Zambi, pasi vendi gëzon një siguri të brendshme të qëndrueshme, duke e bërë atë të favorshëm për investime, thuhet në deklaratën e Ministrisë së Punëve të Brendshme dhe Sigurisë së Brendshme.
Shumë kompani nga Türkiye janë të interesuara të investojnë në sektorë të ndryshëm të ekonomisë së Zambisë falë mjedisit të saj të sigurt për investime, tha Hüseyin Barbaros Dicle.
Duke vlerësuar marrëdhëniet e gjata me Türkiyen, Mwiimbu siguroi Dicle-n se Zambia është e hapur për zhvillim dhe ftoi bizneset nga Türkiye të investojnë në vend, veçanërisht në sektorin tekstil.
"Inkurajimi i investimeve të huaja në vend do të çojë në më shumë të ardhura nga taksat për qeverinë, duke nxitur zhvillimin ekonomik dhe krijimin e pasurisë për vendin", thuhej në deklaratë.
Mwiimbu rikonfirmoi angazhimin e qeverisë për çështjet e sigurisë kombëtare dhe mirëpriti mbështetjen në formën e trajnimeve dhe pajisjeve, thuhej më tej.
Dicle shoqërohej nga Ali Ihsan Ergül, këshilltar për bashkëpunim në siguri dhe çështje të brendshme në ambasadë, si dhe Betül Akbal, sekretarja e dytë e ambasadës.
