Duke rritur kapacitetin e depozitimit të gazit natyror në Silivri të Istanbulit, Türkiye tani ka objektin më të madh të depozitimit të gazit në Evropë.
Sot në Silivri u mbajt një program me rastin e përfundimit të projektit për rritjen e kapaciteteve të depozitës nëntokësore të gazit, ku foli presidenti turk Recep Tayyip Erdoğan.
"Duke rritur kapacitetin, Silivri është bërë objekti më i madh i magazinimit nëntokësor të gazit në Evropë," tha Erdoğan.
Ai theksoi se sot me shërbimet energjetike që ofron për qytetarët dhe industrinë e saj, Türkiye është vendi i 17-të në botë për nga furnizimi.
“Po hyjmë në një epokë të re në të cilën do ta çojmë vendin tonë në krye duke korrur frytet e përpjekjeve që kemi investuar në 20 vitet e fundit”, tha Erdoğan dhe shtoi: “Qëllimi ynë është ta transformojmë vendin tonë sa më shpejt në një qendër globale ku do të përcaktohet çmimi i referencës së gazit natyror. Ne kemi përcaktuar vizionin tonë energjetik për të ulur varësinë tonë të jashtme nga burimet parësore nga 71 për qind në 13 për qind deri në vitin 2053.”
Pas rritjes së kapacitetit, objekti i magazinimit do të jetë në gjendje të plotësojë afërsisht 8 për qind të nevojave vjetore të Türkiyes për gaz natyror.
Nevojat e objektit për energji elektrike do të plotësohen nga një turbinë ere me fuqi të instaluar 4.2 megavat. Kapaciteti i magazinimit u rrit nga 3.2 miliardë në 4.6 miliardë metra kub.
Kapaciteti ditor i prodhimit të kthimit u rrit nga 28 milionë në 75 milionë metër kub.
