Ministria e Mbrojtjes së Türkiyes njoftoi se trupat turke po marrin të gjitha masat e nevojshme për të ruajtur stabilitetin në rajonin e Sirisë veriore.
"Ne gjithashtu vazhdojmë bashkëpunimin dhe koordinimin e ngushtë me aleatët tanë në rajon", tha këshilltari i Ministrisë së Mbrojtjes për Media dhe Marrëdhënie me Publikun, Zeki Akturk.
Ai theksoi se Forcat e Armatosura Turke në vazhdimësi dhe me sukses vazhdojnë operacionet brenda dhe jashtë kufirit kundër të gjitha llojeve të kërcënimeve dhe rreziqeve, përfshirë organizatat terroriste PKK/KCK/PYD-YPG, DAESh (ISIS) dhe FETO.
“Forcat e armatosura turke kanë neutralizuar 53 terroristë gjatë javës së kaluar, dhe që nga 1 janari gjithsej 2.664 terroristë, nga të cilët 1.392 në Irakun verior dhe 1.272 në veri të Sirisë”, tha Akturk.
Ai theksoi se po monitorojnë nga afër aktivitetet e iniciuara nga grupet opozitare në rajonin sirian të Alepos.
“Gjithashtu, ne nuk do të lejojmë që organizata terroriste PKK/YPG, e cila përbën një kërcënim për integritetin territorial të Sirisë dhe sigurinë rajonale, të përfitojë nga destabiliteti i ri”, tha Akturk.
Përleshjet shpërthyen më 27 nëntor midis forcave të regjimit të Bashar al-Asad dhe grupeve të armatosura kundër regjimit në pjesën perëndimore të Aleppos në veri të Sirisë, duke shënuar një ripërshkallëzim të konfliktit pas një periudhe qetësie relative në luftën civile që shpërtheu në Siria në 2011.
