Türkiye pro hapjes së pikave kufitare me Sirinë, për dërgim të ndihmave.     /Foto: AA 

Türkiye ofron hapjen e dy pikave kufitare me Sirinë, për dërgimin e ndihmave kundër tërmetit

Türkiye ka ofruar hapjen e dy pikave kufitare me Sirinë për komunitetin ndërkombëtar për të dërguar ndihma humanitare në rajonet veriore të goditura nga tërmeti.

“Ne i thamë komunitetit ndërkombëtar dhe OKB-së se ata mund të dërgonin ndihma humanitare përmes dy portave nën kontrollin tonë. Ne thamë se mund t’i hapim këto porta për ndihmën humanitare”, tha Ministri i Jashtëm turk Mevlüt Çavuşoğlu gjatë një konference të përbashkët shtypi me homologen e tij libiane Najla Al Mangoush në kryeqytetin Ankara të hënën.

Kryediplomati po u referohej dy portave kufitare në provincën jugore të Kilisit.

Ai, megjithatë, shtoi: “Nuk bëhet fjalë që Türkiye të hapë pikat kufitare në vendet (në Siri) të kontrolluara nga PKK-ja dhe YPG-ja”.

Asnjë fluks refugjatësh

Çavuşoğlu mohoi akuzat se kishte një fluks refugjatësh nga Siria në Türkiye pas tërmeteve të fuqishëm binjak të javës së kaluar.

“Türkiye mund të hapë hapësirën e saj ajrore nëse Belgjika ose vendet e tjera evropiane duan të marrin refugjatët sirianë në vendet e tyre,” shtoi ai.

Të paktën 31.643 njerëz humbën jetën nga tërmetet e njëpasnjëshme që goditën Türkiye juglindore më 6 shkurt, sipas shifrave të fundit zyrtare.

Tërmetet me magnitudë 7,7 dhe 7,6, me qendër në provincën Kahramanmaraş, prekën më shumë se 13 milionë njerëz në 10 provincat: Hatay, Gaziantep, Adiyaman, Malatya, Adana, Diyarbakir, Kilis, Osmaniye dhe Sanliurfa.

Në Sirinë fqinje, numri i të vdekurve ka shkuar mbi 3.500, me më shumë se 5.200 të lënduar.

TRT Balkan / agjencitë