Presidenti turk Recep Tayyip Erdoğan u dha të martën medalje ekipeve vendase dhe të huaja që kontribuan në përpjekjet e kërkim-shpëtimit pas tërmeteve të fuqishme të 6 shkurtit të cilat goditën jugun e Türkiyes, duke marrë jetën e më shumë se 50.000 njerëzve.
"Sot, ne do t'u japim medalje ekipeve vendase dhe të huaja të kërkim-shpëtimit që bënë sakrifica gjatë tërmeteve të 6 shkurtit," tha Erdoğan në ceremoninë e ndarjes së medaljeve presidenciale dhe urdhrit të shërbimit të shquar humanitar.
Ai tha se 55.000 njerëz, të cilët u bënë "simbolet e luftës" pas tërmeteve, do të marrin medaljen dhe urdhrin.
Erdoğan tha se tërmetet e dyfishta ishin një nga fatkeqësitë natyrore "më shkatërruese" jo vetëm në Türkiye, por edhe në historinë e njerëzimit.
"Lutja jonë është që as vendi ynë dhe asnjë vend tjetër në botë të mos përballet me fatkeqësi si kjo që ndodhi më 6 shkurt. Ne nuk duam që askush tjetër të kalojë atë që kemi përjetuar”, tha presidenti turk.
Erdoğan theksoi se 11.320 personel nga 90 vende erdhën në Türkiye pas tërmeteve dhe 60 vende dhe organizata ndërkombëtare dërguan rreth 250.000 tenda në rajon. Ai tha se Türkiye i njeh të gjithë miqtë e vërtetë.
“Ne do të vazhdojmë përpjekjet tona deri në shërimin e plotë të plagëve dhe fshirjen e plotë të gjurmëve të tërmetit”, theksoi presidenti.
