Kryetari i Këshillit të Lartë Zgjedhor të Türkiyes (KShZ), Ahmet Yener, tha se vendimi për rezultatet përfundimtare të zgjedhjeve parlamentare për mbledhjen e 28-të të Asamblesë së Madhe Kombëtare të Türkiyes, të mbajtur më 14 maj, i është dërguar Gazetës Zyrtare për publikim.
Yener u tha gazetarëve në selinë e KShZ-së se procesi i jashtëzakonshëm i kundërshtimeve lidhur me zgjedhjet parlamentare ka përfunduar në orën 17:00 të datës 28 maj dhe Komisioni ka vlerësuar dhe përmbyllur kundërshtimet në seancën e djeshme.
"Si rezultat i takimit që mbajtëm sot, rezultatet përfundimtare të zgjedhjeve parlamentare janë dërguar në Gazetën Zyrtare për publikim," tha Yener, duke shtuar se pjesëmarrja e votuesve ishte 88,92 për qind në Türkiye dhe 53,80 për qind jashtë vendit, me një pjesëmarrje totale prej 87,05 për qind.
Yener tha se sipas rezultateve të zgjedhjeve, Partia për Drejtësi dhe Zhvillim (AK Partia) fitoi 268 vende në parlamentin turk.
Ai tha më tej se Partia e Ri-Prosperitetit fitoi 5, Partia Lëvizja Kombëtare (MHP) 50, Partia e Gjelbër dhe e Ardhmja e Majtë 61, Partia e Punëtorëve Turke 4, Partia Popullore Republikane (CHP) 169 dhe Partia IYI 43 vende në Parlament.
"Ne duam që nga këto rezultate të përfitojnë partitë tona dhe demokracia turke," tha Yener.
