Australia i ka dërguar Twitter-it një njoftim ligjor, duke kërkuar një shpjegim se çfarë ka ndërmarrë rrjeti social për të parandaluar një nivel "tashmë të pafalshëm të lartë" të abuzimit në internet.
Julie Inman Grant, komisarja e Australisë për siguri në internet (eSafety), tha në një deklaratë se hulumtimi i kryer nga institucioni i saj zbuloi se "gati 1 në 5 australianë kanë përjetuar një formë të urrejtjes në internet".
"Ky nivel i abuzimit në internet është tashmë në mënyrë të pafalshme i lartë," tha Grant.
Njoftimi i lëshuar për opinionin nga Grant i kërkon Twitter-it të shpjegojë se si po "zbatonte politikën e rasteve së urrejtjes" dhe informata që kanë të bëjnë me llogaritë e ndaluara më parë për urrejtje.
"Urrejtja ka qenë një armë e përdorur për shekuj me efekte shkatërruese, duke sulmuar njerëzit në bazë të racës, besimit ose identitetit," tha Grant, duke shtuar: "Ajo që është e re është përhapja e kanaleve në internet me anë të të cilave urrejtja mund të bëhet virale".
Megjithatë, Grant i vlerësoi rrjetet sociale si "një nga dhuratat më të mëdha", duke pranuar se rrjetet sociale "u kanë dhënë zë atyre që më parë ishin të heshtur, duke shërbyer si një nivelues i shkëlqyeshëm dhe duke lejuar këdo që t'i thotë të vërtetën pushtetit".
Duke vlerësuar Twitter-in për "natyrën spontane, të hapur dhe virale", ajo tha: "Dikur besoja se asnjë platformë tjetër nuk kishte mundësi më të mirë për të ofruar barazi të vërtetë të mendimit dhe shprehjes së lirë".
Pasi ka punuar në Twitter në vitin 2014 pas "transformimit të mrekullueshëm të Pranverës Arabe", Grant tha se ishte shumë e bindur për potencialin e rrjetit social për ndryshime pozitive sociale.
Megjithatë, ajo tha se Twitter-i sot "dështon të përballet me realitetin e errët se platforma po përdoret gjithnjë e më shumë si një mjet për shpërndarjen e urrejtjes dhe abuzimit në internet".
"Ne jemi tashmë të vetëdijshëm për raportet se aktivizimi i disa prej këtyre llogarive të ndaluara më parë ka inkurajuar polarizuesit ekstremë dhe nxitësit e zemërimit dhe urrejtjes, duke përfshirë neonazistët australianë", shtoi Grant.
Sipas raportimeve lokale, ESafety i ka dhënë Twitter-it 28 ditë për të dhënë sqarime, përndryshe do të përballet me gjoba të rënda për çdo ditë që tejkalon afatin.
