Thirrja e ministrit të Jashtëm izraelit, Israel Katz, për të zhvendosur njerëzit nga Bregu Perëndimor është "plotësisht e papranueshme", reagoi të enjten shefi i politikës së jashtme të BE-së.
Para se të merrte pjesë në takimin jozyrtar të ministrave të jashtëm të BE-së në Bruksel, Josep Borrell deklaroi për gazetarët se Koordinatorja e Lartë Humanitare dhe Rindërtimi e OKB-së për Gazën, Sigrid Kaag, do t'i informojë ministrat për situatën në terren.
Ajo do të "shpjegojë situatën, madje edhe të Kombeve të Bashkuara, të cilat janë nën presion të fortë nga qeveria izraelite, duke i penguar të gjitha organizatat e Kombeve të Bashkuara të bëjnë punën e tyre," tha Borrell.
Borell shprehu gjithashtu keqardhje për vonesën në rezultatin e mundshëm të bisedimeve të armëpushimit dhe rritjen e viktimave civile ndërsa bombardimet vazhduan.
“Thirrja e ministrit të punëve të jashtme të Izraelit për të zhvendosur njerëzit nga Bregu Perëndimor, duke bërë pak a shumë të njëjtën gjë që bënë me njerëzit në Gaza, kjo është krejtësisht e papranueshme”, tha Borrell.
Ndërkaq, ai tha se ministrat e BE-së të ngrenë zërin kundër kësaj, si dhe “trajtimit të Kombeve të Bashkuara dhe mënyrës se si po kryhet kjo luftë në përputhje me të gjitha shkeljet e ligjit humanitar”.
Të mërkurën, ushtria izraelite nisi një operacion të madh ushtarak në Bregun Perëndimor verior, më i madhi në dy dekada, duke vrarë 17 palestinezë, sipas agjencisë zyrtare palestineze të lajmeve Wafa.
Ministri i Jashtëm izraelit Israel Katz bëri thirrje për "evakuimin e përkohshëm" të civilëve palestinezë si dhe "çfarëdo hapi që kërkohet" për të kryer operacionin.
