Dy gazetarë të tjerë palestinezë u vranë në sulmet izraelite në Rripin e Gazës të dielën, duke e çuar numrin e të vdekurve që nga 7 tetori në 109, njoftoi zyra e qeverisë për media në Gaza.
Në një deklaratë, zyra identifikoi dy viktimat Hamza Wael Al-Dahdouh, djali i shefit të zyrës së Al Jazeera në Gaza, Wael Al-Dahdouh dhe Mustafa Thuraya, të cilët humbën jetën pas një sulmi izraelit me bombë në makinën e tyre në qytetin Khan Younis në Rripin jugor të Gazës.
Zyra e medias e cilësoi në termat më të fortë këtë “krim të tmershëm” të kryer nga ushtria pushtuese izraelite kundër gazetarëve.
Izraeli synon "të frikësojë gazetarët në një përpjekje të dështuar për të errësuar të vërtetën dhe për të parandaluar mbulimin mediatik", shtoi zyra.
Zyra e medias u bëri thirrje “të gjitha sindikatat e shtypit, të të drejtave të njeriut dhe organeve ligjore që të dënojnë këtë krim dhe të denoncojnë kryerjen e përsëritur të tij nga forcat okupuese”.
Gjithashtu zyra për media në Gaza bëri thirrje për presion mbi "pushtuesin për të ndaluar luftën gjenocidale kundër popullit palestinez të pambrojtur në Rripin e Gazës".
Që nga sulmi ndërkufitar i Hamasit më 7 tetor, Izraeli ka vazhduar sulmet e pamëshirshme në Rripin e Gazës, duke vrarë të paktën 22,722 palestinezë dhe duke plagosur 58,166, sipas autoriteteve lokale shëndetësore.
