Bashkëshortja e presidentit turk Recep Tayyip Erdoğan, Emine Erdoğan, deklaroi se ngjarjet në Palestinë nuk përfaqësojnë një akt legjitim ose të drejtën për vetëmbrojtje, por mund të përkufizohen qartë si një “Holokaust postmodern” që Izraeli po zbaton mbi territorin palestinez.
Në kryeqytetin e Katarit nisi sot Forumi Doha 2024, një aktivitet dyditor mbi temën “Nevoja për inovacione”, që mblodhi personalitete të shquara nga mbarë bota. Zonja e parë e Türkiyes mori pjesë në një sesion të titulluar “Një zemër për Palestinën: Mbrojtja e shpresës në errësirën e okupimit dhe gjenocidit”.
Duke folur në Forum para rreth 6,000 pjesëmarrësve, Erdoğan përmendi se kanë kaluar 395 ditë që kur fëmijët palestinezë bënë thirrje nga spitali Al-Shifa për mbrojtje. Ajo përkujtoi gjithashtu se UNICEF-I kishte përkufizuar Gazën si një “varrezë për fëmijët” 407 ditë më parë dhe se në granatimet në Rafah 195 ditë më parë kishin humbur jetën 44 persona.
Erdoğan theksoi se sot është dita e 428-të e gjenocidit ndaj palestinezëve dhe se për 14 muaj bota ka qenë dëshmitare e një prej sulmeve më brutale ndaj ndërgjegjes dhe dinjitetit njerëzor.
“Nën maskën e ‘vetëmbrojtjes legjitime’, po fshihet një popull dhe kultura e tij. Viktima janë të gjithë palestinezët, pa dallim moshe, gjinie, apo feje. Në emër të ndërgjegjes njerëzore, pyes: në cilën fe apo ligj është e drejtë vrasja e 44 mijë civilëve, përfshirë 16 mijë fëmijë, apo bombardimi i spitaleve, shkollave dhe jetimoreve?” pyeti Erdoğan.
Ajo shtoi se populli palestinez po përjeton diskriminim çnjerëzor dhe okupim të vazhdueshëm për pothuajse një shekull, që gjatë vitit të fundit është shndërruar në një nga gjenocidet më të errëta në histori.
“Çfarë po ndodh në Palestinë nuk është luftë, por një përpjekje për të imponuar një rend botëror ku mbijetojnë vetëm më të fuqishmit dhe më të pamëshirshmit,” tha Erdoğan, duke kritikuar politikën hipokrite dhe heshtjen e botës, veçanërisht të vendeve perëndimore.
“Me një zemër për Palestinën, ne ndjekim rrugën e paqes dhe shpëtimit. Populli i Gazës, përmes qëndresës së tij të ndershme, na kujton vlerat njerëzore që kemi harruar,” shtoi ajo.
Erdoğan përfundoi duke theksuar se Türkiye vijon përpjekjet diplomatike për ndihmë humanitare dhe për njohjen e Palestinës si një shtet të pavarur, duke dërguar deri tani 88 mijë tonë ndihma humanitare në Gaza.
