Një grup fëmijësh në kampin e refugjatëve Jabalia në Rripin e Gazës mbajtën një protestë të hënën kundër kufizimit të Izraelit për dërgesat e karburantit në enklavën palestineze.
Fëmijët i bënë thirrje Agjencisë së Kombeve të Bashkuara për Ndihmë dhe Punë që të ndërhyjë dhe të sigurojë dërgimin e karburantit në zonë.
Në kundërshtim me vendimin e përkohshëm të Gjykatës Ndërkombëtare të Drejtësisë, Izraeli vazhdon sulmet e tij në Rripin e Gazës, ku që nga 7 tetori, sipas autoriteteve shëndetësore palestineze, janë vrarë të paktën 34.454 palestinezë, kryesisht gra dhe fëmijë, dhe 77.575 të tjerë janë plagosur.
Lufta e Izraelit ka shtyrë 85 për qind të popullsisë së Rripit të Gazës në zhvendosje të brendshme me mungesë akute të ushqimit, ujit të pastër dhe ilaçeve, ndërsa 60 për qind e infrastrukturës së enklavës është dëmtuar ose shkatërruar, sipas Kombeve të Bashkuara.
Izraeli akuzohet për gjenocid para Gjykatës Ndërkombëtare të Drejtësisë. Një vendim i përkohshëm në janar urdhëroi Tel Avivin të ndalojë aktet gjenocidale dhe të marrë masa për të siguruar që ndihma humanitare të ofrohet për civilët në Gaza.
