Ministria e Punëve të Jashtme franceze njoftoi të enjten se dy anëtarë të stafit të Konsullatës së Përgjithshme Franceze në Al-Kuds/Jerusalem u arrestuan nga forcat izraelite të sigurisë dhe më pas u liruan pas ndërhyrjes së ministrit.
“Si pjesë e një udhëtimi në Izrael dhe territoret palestineze, ministri (Jean-Noel Barrot) do të vizitonte Eleonae, një pronë kombëtare franceze”, thuhet në njoftimin e ministrisë.
Duke vënë në dukje se forcat e armatosura izraelite të sigurisë kishin shkelur vendin e administruar nga Franca, njoftimi thoshte:"Ministri nuk dëshironte të vizitonte pronën në këto kushte".
Duke i quajtur veprimet "të papranueshme", ministria tha se arrestimet u bënë pavarësisht se anëtarët e stafit ishin agjentë me status diplomatik.
“Ata u liruan më vonë pasi ministri ndërhyri”, shtohet në njoftim.
Më tej, nga ministria theksua se Franca i dënon këto veprime, veçanërisht sepse ky vend po bën gjithçka që mundet për ta depërshkallëzuar dhunën në rajon.
Në njoftim thuhet se ambasadori izraelit në Francë do të ftohet në ministri në ditët në vijim.
