Qeveria në Gaza e ka përshkruar kërkesën e Izraelit për evakuimin e Spitalit Evropian në qytetin Khan Younis si "krim të ri historik".
Zyra e Qeverisë për Media në Gaza iu përgjigj kërkesës së Izraelit për të "evakuuar zonën" në lindje të qytetit të Khan Younis, ku ndodhet Spitali Evropian.
Në një deklaratë, ata e karakterizuan detyrimin e Izraelit për të evakuuar pacientët dhe stafin nga spitali si "një krim i ri historik në të dhënat e Tel Avivit".
Ata deklaruan se Izraeli synon të krijojë një krizë humanitare dhe shëndetësore në Gaza, ku 34 spitale kanë qenë jashtë shërbimit që nga 7 tetori.
"Evakuimi i spitalit do të thellojë krizën aktuale shëndetësore në Gaza dhe do të rrezikojë jetën e mijëra të lënduarve dhe pacientëve. Është një fatkeqësi humanitare", deklaroi Zyra e Qeverisë në Gaza.
Është raportuar se Izraeli, ShBA-ja dhe komuniteti ndërkombëtar janë përgjegjës për këto krime që synojnë sektorin shëndetësor, spitalet dhe personelin mjekësor në Gaza.
Ekipet mjekësore dhe teknike kanë nisur dje evakuimin e pacientëve.
Spitali Evropian në Khan Younis është një nga të paktët që operojnë në Rripin e Gazës, pasi ushtria izraelite qëllimisht dhe sistematikisht shënjestroi shumicën e spitaleve në enklavën e bllokuar gjatë operacioneve ushtarake, duke lënë shumicën e tyre jashtë përdorimit.
Të hënën, ushtria izraelite urdhëroi banorët e pjesës lindore të Khan Younis të largoheshin menjëherë nga zona, duke pretenduar se zona ishte kthyer në një "zonë të rrezikshme luftarake".
Ushtria u kërkoi njerëzve të shkonin në zonat e njohura si zona humanitare në pjesën perëndimore të qytetit, të njohura si Al-Mawasi.
Në shkelje të një rezolute të Këshillit të Sigurimit të Kombeve të Bashkuara që kërkon një armëpushim të menjëhershëm, Izraeli është përballur me dënimin ndërkombëtar për ofensivën e vazhdueshme brutale kundër Rripit të Gazës që nga sulmi i 7 tetorit 2023 nga Hamasi.
