Gazetari i AFP-së, Arman Soldin, i lindur në Sarajevë, humbi jetën të martën përderisa raportonte nga Ukraina lindore.
“Jemi të tronditur kur mësuam për vdekjen e sotme të video gazetarit të AFP-së, Arman Soldin, në Ukrainën lindore. Të gjitha mendimet tona janë me familjen dhe të dashurit e tij”, tha agjencia franceze në Twitter.
Sipas AFP-së, Soldin, i cili ishte koordinatori i tyre i videos për Ukrainën, u vra në një sulm me raketa pranë Chasiv Yar, konfirmuar nga kolegët e tij të AFP-së që dëshmuan incidentin.
Sulmi ndodhi në periferi të Chasiv Yar, pranë Bakhmut, epiqendra e luftimeve në Ukrainën lindore për disa muaj.
“Vdekja e tij është një kujtesë e tmerrshme e rreziqeve me të cilat përballen gazetarët çdo ditë duke mbuluar konfliktin në Ukrainë”, tha kreu i agjencisë AFP Fabrice Fries, në lidhje me vdekjen e Arman Soldin.
I lindur në Sarajevë në 1991, Soldin ishte një shtetas francez. Ai filloi të punojë për AFP-në si praktikant korrespondent në Romë në 2015 dhe më vonë u punësua në Londër. Ai ishte pjesë e ekipit të parë të AFP-së të dërguar në Ukrainë pas fillimit të pushtimit rus më 24 shkurt 2022, duke mbërritur të nesërmen. Soldin ka jetuar në Ukrainë që nga shtatori, duke udhëhequr raportimin e ekipit dhe duke udhëtuar rregullisht në vijat e frontit në lindje dhe jug.
