Ministri i Jashtëm turk Hakan Fidan hodhi poshtë të mërkurën planin e presidentit amerikan Donald Trump për t'i zhvendosur palestinezët nga Gaza, duke e quajtur atë "të papranueshëm" dhe duke e konsideruar atë të gabuar.
Duke folur në tryezën e redaktorëve të Anadolu-s në kryeqytetin Ankara, Fidan tha se Türkiye kundërshton të gjitha nismat që synojnë të përjashtojnë popullin e Gazës nga ekuacioni në rajon, duke e riafirmuar angazhimin e saj ndaj të drejtave palestineze.
Ai paralajmëroi se bota po zhvendoset drejt një "ligji të xhunglës", ku askush nuk merr parasysh nevojat e të tjerëve dhe zbaton filozofinë e "fuqia e bën ligjin".
Trump shkaktoi debat duke sugjeruar që palestinezët në Gaza duhet të zhvendosen në Jordani dhe Egjipt, duke e quajtur enklavën një "vend të shkatërruar" pas luftës shkatërruese të Izraelit. Propozimi i tij, megjithatë, është refuzuar me vendosmëri nga Amani dhe Kajro.
Të martën, Trump tha gjatë një konference për shtyp në Uashington me kryeministrin izraelit Benjamin Netanyahu se ShBA-ja "do ta marrë nën kontroll" Gazën pasi t'i zhvendosë palestinezët diku tjetër.
