Hamasi njoftoi se "tregoi një qëndrim pozitiv me vetëdije për përgjegjësinë kombëtare" në të gjitha fazat e negociatave për një armëpushim dhe një marrëveshje për shkëmbimin e të burgosurve në Rripin e Gazës.
Ata deklaruan se janë të përkushtuar ndaj një marrëveshjeje gjithëpërfshirëse dhe të pranueshme të bazuar në kërkesat legjitime të popullit palestinez, duke përfshirë një ndërprerje të përhershme të sulmeve, një tërheqje të plotë nga Rripi i Gazës, kthimin e të zhvendosurve dhe rindërtimin e zonës.
"Ne kemi treguar qëndrimin pozitiv të nevojshëm për të arritur një marrëveshje", tha Hamasi.
Ata kujtuan se propozimi i paraqitur nga ta dhe i miratuar nga ndërmjetësit më 5 maj u prit pozitivisht nga ndërmjetësit dhe se “kryeministri izraelit Benjamin Netanyahu iu përgjigj propozimit duke sulmuar qytetin Rafah në jug të Gazës dhe duke intensifikuar sulmin në Gaza”.
Në deklaratë thuhet se Hamasi mirëpriti propozimin e armëpushimit të shpallur nga presidenti amerikan Joe Biden më 31 maj, por qeveria Netanyahu nuk iu përgjigj propozimit, përveç vazhdimit të luftës gjenocidale në Gaza.
U raportua se Hamasi ishte i kënaqur me rezolutën e Këshillit të Sigurimit të Kombeve të Bashkuara për armëpushimin në Gaza dhe u përcolli ndërmjetësuesve synimin e tij për të filluar negociatat indirekte në lidhje me zbatimin e këtij vendimi.
U theksua se Izraeli kundërshtoi qartë një armëpushim të përhershëm në Rripin e Gazës në lidhje me vendimin e KS-OKB-së dhe propozimin e Bidenit.
Hamasi tha se asnjë zyrtar izraelit nuk kishte folur në përgjigje të deklaratave të Sekretarit të Shtetit të ShBA-së Antony Blinken se Izraeli kishte pranuar propozimin e fundit.
Këshilli i Sigurimit i OKB-së miratoi të hënën një rezolutë që mbështet propozimin e armëpushimit të Gazës të paraqitur nga presidenti amerikan Joe Biden.
Propozimi do të nënkuptonte një pauzë gjashtëjavore në luftime dhe lirimin e disa të burgosurve izraelitë në Gaza dhe të burgosurve palestinezë nga burgjet izraelite, gjë që do të lejonte negociatat për një armëpushim të përhershëm.
