Agjencia Turke e Inteligjencës (MIT) kapi të hënën kreun e DAESh-it në qytetin Haleb të Sirisë, Abdullah al Jundi, i cili planifikoi sulme kundër forcave turke në zonat e Operacionit Mburoja e Eufratit dhe Dega e Ullirit.
Sipas informacioneve të marra nga forcat e sigurisë, Al Jundi, i koduar Hattab El Muhaxhir, ishte përgjegjës për planifikimin e veprimeve kundër automjeteve që i përkisnin forcave turke të sigurisë në Siri.
Terroristi u kap gjatë një operacioni të kryer nga MIT dhe forcat lokale të sigurisë të lidhura me Ushtrinë Kombëtare Siriane në zonën e Operacionit Mburoja e Eufratit.
Terroristi dha informacione edhe për anëtarët e organizatës që kryenin aktivitete terroriste.
Disa materiale digjitale që i përkisnin organizatës u kapën gjithashtu gjatë operacionit, duke zbuluar planet e veprimit të DAESh dhe duke ndërprerë aktivitetet e organizatës.
Në vitin 2013, Türkiye u bë një nga vendet e para që e shpalli DAESh-in organizatë terroriste.
Vendi që atëherë është sulmuar nga grupi terrorist disa herë, me mbi 300 njerëz të vrarë dhe qindra të tjerë të plagosur në të paktën 10 sulme vetëvrasëse, shtatë sulme me bomba dhe katër sulme të armatosura. Si kundërpërgjigje, Türkiye nisi operacione anti-terror brenda dhe jashtë vendit për të parandaluar sulme të mëtejshme.
