Ish-senatori amerikan Bob Menendez (71) është dënuar me 11 vjet burg federal për akuza lidhur me ryshfet, shantazh dhe korrupsion.
Menendez, një përfaqësues i gjatë i demokratëve nga New Jersey, u shpall fajtor për 16 pika të aktakuzës, të cilat përfshinin marrjen e ryshfetit, duke përfshirë shufra ari dhe para në dorë, në këmbim të favoreve politike.
Në një fjalim 12-minutësh me lot para se të shqiptohej vendimi në një gjykatë federale në New York, Menendez pranoi gabimet e së kaluarës, por mbrojti shërbimin e tij publik, raportojnë disa media amerikane që ishin të pranishme në seancë.
“Kam bërë shumë më tepër gjëra të mira sesa të këqija”, tha ai.
Një juri federale në New York e shpalli Menendezin fajtor në korrik për pranimin e qindra mijëra dollarëve në ryshfet dhe për veprim si agjent i paregjistruar i huaj.
Prokurorët thanë se Menendez ka pranuar ryshfet nga tre biznesmenë nga New Jersey – Fred Daibes, Wael Hana dhe Jose Uribe duke përfshirë shufra ari, pagesa hipoteke, një makinë luksoze dhe më shumë se 480.000 dollarë para në dorë. Në këmbim të kësaj, ai dyshohet se mbrojti individë nga ndjekja penale dhe përdori zyrën e tij për të favorizuar qeveritë e Egjiptit dhe Katarit.
Menendez dha dorëheqjen nga posti i kryetarit të Komisionit të Senatit për Marrëdhëniet me Jashtë në gusht. Ai ishte gjithashtu i njohur për kundërshtimin e shitjes së armëve Türkiyes, aleatit të ShBA-së në NATO, për shkak të lidhjeve të tij të dukshme me lobet greke dhe armene në ShBA.
