Shumë palestinezë u plagosën dhe u arrestuan në bastisjet e kryera nga ushtria izraelite herët në mëngjes në qytetet dhe qytezat e Bregut Perëndimor të pushtuar
Ushtarët izraelitë bastisën qytetin e Jeninit në Bregun Perëndimor dhe kampin e refugjatëve, Qalqiliya, Tulkarm, kampin e refugjatëve Nur Shams dhe kampin e refugjatëve Aqabath Jebr afër Jerichos dhe disa vendbanime të tjera.
Dëshmitarët okularë, të cilët dhanë informacion për Anadolun, deklaruan se ushtarët izraelitë kontrolluan shumë shtëpi gjatë bastisjes në qytetin e Jeninit dhe kamp dhe se buldozerët e ushtrisë po gërmonin rrugët e kampit.
Sipas dëshmitarëve, ushtarët izraelitë hapën zjarr ndaj shumë palestinezëve rreth Spitalit Shtetëror Halil Suleiman në Jenin dhe se shumë palestinezë u arrestuan, duke përfshirë administratorë dhe aktivistë të Hamasit.
Dëshmitarët okularë theksuan se ushtarët izraelitë, të cilët bastisën gjithashtu qytetin e Tulkarmit dhe kampet e refugjatëve Tulkarm dhe Nur Shams, rrethuan plotësisht kampin Nur Shams dhe bastisën shumë shtëpi.
Në deklaratën me shkrim të Gjysmëhënës së Kuqe Palestineze, thuhet se nga sulmi i ushtarëve izraelitë në kampin e refugjatëve palestinezë Tulkarm janë plagosur 3 palestinezë.
Raportohet se ushtarët izraelitë që bastisën qytetin e Qalqiliyas përdorën plumba të vërtetë në konfliktin me palestinezët dhe arrestuan shumë njerëz.
Asnjë deklaratë zyrtare nuk është bërë ende nga autoritetet palestineze në lidhje me bastisjet dhe plagosjet e kryera nga Izraeli në qytete dhe qyteza të ndryshme të Bregut Perëndimor të pushtuar.
Ministria palestineze e Shëndetësisë njoftoi dje se një i ri palestinez vdiq si pasojë e zjarrit të hapur nga ushtarët izraelitë rreth qytetit të Nablusit në Bregun Perëndimor të pushtuar.
Që nga 7 tetori 2023, kur forcat izraelite nisën një sulm në Rripin e Gazës, ka pasur një rritje të ndalimeve, bastisjeve dhe sulmeve kundër palestinezëve në Bregun Perëndimor të pushtuar dhe Kudsin Lindor.
383 palestinezë kanë humbur jetën në sulmet e forcave izraelite dhe kolonëve hebrenj në Bregun Perëndimor të pushtuar dhe Kudsin Lindor që nga 7 tetori.
