Izraeli kreu sulme ajrore të martën vonë në disa lokacione në fshatrat e Damaskut dhe provincën Daraa në jug të Sirisë.
Avionët luftarakë izraelitë shënjestruan zonën Al-Kiswah në jug të Damaskut dhe Izraa në Daraa me të paktën katër sulme ajrore, sipas një korrespondenti të Anadolu.
Një sulm thuhet se goditi një depo armësh në Al-Kiswah, duke shkaktuar zjarr në vendngjarje.
Ministri izraelit i Mbrojtjes, Israel Katz, konfirmoi sulmet, duke paralajmëruar se "çdo përpjekje nga forcat e regjimit sirian dhe organizatat terroriste të vendit për t'u vendosur në zonën e sigurisë në jug të Sirisë do të përballet me zjarr".
Katz tha se “forcat ajrore aktualisht po godasin Sirinë jugore si pjesë e politikës sonë të re për të pastruar zonën nga armët. Mesazhi është i qartë: ne nuk do të lejojmë që Siria jugore të bëhet Libani jugor”.
“Ne nuk do të rrezikojmë sigurinë e qytetarëve tanë”, shtoi ai.
Ushtria izraelite tha se kreu sulme ajrore ndaj objektivave ushtarake në Sirinë jugore, “përfshirë qendra komanduese dhe vende të shumta që përmbajnë armë”, sipas një deklarate të lëshuar të martën vonë.
Ushtria pretendoi se prania e pajisjeve dhe aseteve ushtarake në Sirinë jugore "paraqet një kërcënim për qytetarët e Izraelit", duke u zotuar "të operojë për të hequr çdo kërcënim".
Autoritetet siriane nuk kanë dhënë një përgjigje.
Ministri i Jashtëm izraelit Gideon Sa'ar përsëriti të hënën se Siria duhet të kthehet në një shtet federal me rajone autonome.
Gjatë një takimi të partneritetit BE-Izrael në Bruksel, ai tha se "një Siri e qëndrueshme mund të jetë vetëm një Siri federale që përfshin rajone të ndryshme autonome dhe respekton mënyra të ndryshme jetese", sipas një deklarate nga Ministria e Jashtme e Izraelit.
Të dielën, kryeministri izraelit Benjamin Netanyahu tha se Izraeli “nuk do të lejojë ushtrinë e re siriane të lëvizë në territorin në jug të Damaskut”.
“Ne kërkojmë çmilitarizimin e plotë të Sirisë jugore nga trupat e regjimit të ri sirian në provincat Quneitra, Daraa dhe Suweyda”, tha Netanyahu në një konferencë shtypi në Holon, Distrikti i Tel Avivit.
Ai tha se Izraeli nuk do të tolerojë asnjë kërcënim ndaj komunitetit Druze në Sirinë jugore.
Pas rënies së regjimit të Bashar al-Assad në dhjetor, Izraeli zgjeroi pushtimin e lartësive siriane të Golanit duke pushtuar zonën mbrojtëse të demilitarizuar, një veprim që shkeli marrëveshjen e shkëputjes së vitit 1974 me Sirinë.
Ushtria izraelite gjithashtu intensifikoi sulmet ajrore duke synuar pozicionet ushtarake siriane në të gjithë vendin.
Përparimet e fundit ushtarake të Izraelit në lartësitë e Golanit, të cilat i ka pushtuar që nga viti 1967, kanë tërhequr reagimet nga OKB-ja dhe disa vende arabe.
Assad, udhëheqësi i Sirisë për gati 25 vjet, iku në Rusi pasi grupet anti-regjim morën kontrollin e Damaskut më 8 dhjetor, duke i dhënë fund regjimit të Partisë Baath, i cili kishte qenë në pushtet që nga viti 1963.
Presidenti i Qeverisë Tranzitore të Sirisë, Ahmed al-Sharaa, i cili mori postin më 29 janar, e ngarkoi Mohammed Al-Bashir të formonte një qeveri për të mbikëqyrur periudhën e tranzicionit.
