Të afërmit e pengjeve izraelite protestuan për të kërkuar vazhdimin e marrëveshjes së shkëmbimit të pengjeve midis Izraelit dhe Hamasit.
Protestuesit, të cilët kërkuan që qeveria e Netanyahut ta zbatojë marrëveshjen e shkëmbimit të pengjeve me Hamasin dhe t'i kthejë pengjet izraelite të mbajtur në Gaza, kanë bllokuar autostradën numër 1 që lidh Kudsin me Tel Avivin.
Demonstruesit kanë protestuar kundër pezullimit të marrëveshjes, duke i bërë thirrje qeverisë izraelite t'i përmbahet marrëveshjes.
Më herët, krahu ushtarak i Hamasit, Brigada Al-Qassam, njoftoi shtyrjen e lirimit të pengjeve izraelite të planifikuar për të shtunën, duke përmendur si arsye shkeljet e vazhdueshme të marrëveshjes së armëpushimit nga Izraeli.
Marrëveshja prej tri fazash e armëpushimit ka qenë në fuqi në Gaza që nga 19 janari, duke ndalur luftën gjenocidale të Izraelit që ka vrarë të paktën 48 mijë njerëz dhe e ka lënë enklavën në gërmadha.
Në fazën e parë të armëpushimit, që është caktuar të zgjasë deri në fillim të marsit, 33 pengje izraelite do të lirohen në këmbim të një numri të burgosurish palestinezë. Shkëmbimi i gjashtë midis Hamasit dhe Izraelit ishte planifikuar këtë javë.
Në muajin nëntor, Gjykata Ndërkombëtare Penale lëshoi urdhërarreste ndaj kryeministrit izraelit, Benjamin Netanyahu, dhe ish-ministrit të Mbrojtjes, Yoav Gallant, duke i akuzuar për krime lufte dhe krime kundër njerëzimit në Gaza.
Izraeli për luftën në enklavë gjithashtu përballet me një padi gjenocidi në Gjykatën Ndërkombëtare të Drejtësisë.
