Izraeli sinjalizoi nisjen e një sulmi në shkallë të gjerë në jug të Rripit të Gazës, për të cilën pjesë pretendonte se do të ishte një zonë e sigurt, dhe e shpalli vendbanimin më të madh të Khan Younis një fushë betejë.
Ushtria izraelite ka kërkuar evakuimin e disa zonave në Khan Younis, në Rripin jugor të Gazës, ku ka rifilluar sulmet pas përfundimit të “pauzës humanitare”.
Forcat izraelite hodhën fletëpalosje nga ajri në katër zona të Khan Younis në jug të Gazës, duke paralajmëruar qytetarët të largohen nga shtëpitë e tyre.
"Për banorët e Al Karar, Al Huzaa, Absan dhe Beni Suheyl: Ju duhet të evakuoni zonën menjëherë dhe të shkoni në strehimore në zonën e Rafah. Qyteti i Khan Younis është një zonë e rrezikshme lufte", thuhej në fletëpalosje.
Ushtria izraelite lëshoi gjithashtu një hartë që ndan të gjithë Rripin e Gazës në më shumë se 2.300 blloqe për të treguar vendet ku thotë se palestinezët mund të gjejnë strehim gjatë sulmeve të rinovuara në rajonin ku 1,7 milion njerëz janë detyruar të migrojnë.
Rripi i Gazës, ku ushtria izraelite shtrëngoi bllokadën dhe pushtoi një pjesë të saj, shfaqet si rajoni i tretë më i madh në botë për sa i përket densitetit të popullsisë për kilometër katror, me 2,3 milionë banorë që jetojnë në një sipërfaqe prej 365 kilometra katrorë.
Mëngjesin e sotëm ka përfunduar “pauza humanitare”, e cila kishte hyrë në fuqi të premten e 24 nëntorit, në kuadër të marrëveshjes mes Izraelit dhe Hamasit. Izraeli më pas filloi menjëherë të sulmonte dhe bombardonte disa lokacione në Rripin e Gazës.
