Të paktën 27 persona u vranë në sulmet ajrore izraelite në Libanin lindor dhe jugor sot, tha Ministria e Shëndetësisë e vendit.
Në një deklaratë të ministrisë thuhet se një sulm izraelit në qytetin lindor Aalamat në rrethin Jbeil vrau 20 njerëz, duke përfshirë tre fëmijë.
Ajo shtoi se gjashtë të tjerë u plagosën në sulm, ndërsa përpjekjet e shpëtimit janë ende në vazhdim për të kërkuar të mbijetuarit.
Sipas ministrisë, tre persona u vranë gjithashtu dhe dy të tjerë u plagosën kur avionët luftarakë izraelitë kryen një sulm ajror në qytetin Mashghara në Libanin lindor.
Një person tjetër u vra dhe katër persona u plagosën në një sulm tjetër në Sohmor në rajonin perëndimor Bekaa në Libanin lindor, tha ministria.
Tre paramedikë humbën jetën gjithashtu në një sulm ajror izraelit në një qendër të kujdesit shëndetësor në qytetin Aadloun në Libanin jugor, njoftohet më tej.
Fushata masive ajrore izraelite në Liban ka vazhduar që nga fundi i shtatorit kundër atyre që Izraeli pretendon se janë objektiva të Hezbollahut, përshkallëzim ky i luftës ndërkufitare njëvjeçare që nga fillimi i sulmeve në Gaza.
Më shumë se 3.100 njerëz janë vrarë dhe mbi 13.800 janë plagosur në sulmet izraelite që nga tetori 2023, sipas autoriteteve shëndetësore libaneze.
Izraeli nisi po ashtu një ofensivë tokësore në Libanin jugor më 1 tetor.
