Ushtria izraelite të mërkurën kreu 12 shkelje të tjera të armëpushimit midis Izraelit dhe Libanit, që hyri në fuqi javën e kaluar, sipas Agjencisë Kombëtare të Lajmeve të Libanit.
Sipas raportimeve, shkeljet izraelite u dokumentuan në distriktet e Tiros, Marjayoun dhe Bent Jbeil në jug të Libanit, si dhe në Bejrut.
Shkeljet përfshinin shkatërrimin e shtëpive, bombardime me artileri, fluturime të avionëve luftarakë mbi territorin libanez, të shtëna me armë zjarri dhe hyrje të forcave në territorin libanez.
Një dron izraelit sulmoi një automjet në qytetin Majdalzoun në distriktin e Tiros, ndërsa artileria izraelite bombardoi fushën e Marjayoun të paktën tre herë gjatë ditës së kaluar, sipas agjencisë së lajmeve.
Armatimet izraelite hapën zjarr ndaj lagjeve në qytetin Bent Jbeil. Ushtria izraelite gjithashtu shkatërroi shtëpi në qytetin Khiyam dhe kreu bombardime me artileri në Kfarkela, sipas raportimeve.
Avionët luftarakë izraelitë u panë duke fluturuar mbi kryeqytetin Bejrut dhe mbi zonat jugore në lartësi të ulët, sipas një raportuesi të Anadolu-s.
Libani ka raportuar 129 shkelje të armëpushimit që nga hyrja e tij në fuqi javën e kaluar, me shpresën për t’i dhënë fund 14 muajve luftimesh midis ushtrisë izraelite dhe Hezbollahut.
Sipas një përllogaritjeje të Anadolu-s bazuar në të dhënat e Ministrisë së Shëndetësisë, të paktën 14 persona janë vrarë dhe 13 të tjerë janë plagosur nga sulmet izraelite që nga java e kaluar.
Në bazë të kushteve të armëpushimit, Izraeli duhet të tërheqë forcat e tij në jug të kufirit të njohur si "Vija Blu" në mënyrë të fazuar, ndërsa ushtria libaneze duhet të dislokojë forcat e saj në jug të Libanit brenda një periudhe maksimale prej 60 ditësh.
Zbatimi i marrëveshjes do të monitorohet nga ShBA-ja dhe Franca, por detajet mbi mekanizmat e zbatimit mbeten të paqarta.
Mbi 4.000 persona janë vrarë dhe më shumë se 16.500 të tjerë janë plagosur në sulmet izraelite në Liban dhe mbi 1 milion të tjerë janë zhvendosur që nga tetori i vitit 2023, sipas autoriteteve shëndetësore libaneze.
