Më shumë se 25 palestinezë u vranë dhe dhjetëra të tjerë u plagosën pas bombardimit izraelit të një shtëpie në qytetin qendror të Gazës të premten, pikërisht në ditën e tretë të festës islame të Fitër Bajramit, kanë raportuar mediat zyrtare.
Agjencia palestineze e lajmeve WAFA ka njoftuar se, “Izraeli nisi bastisje në një shtëpi që i përkiste familjes Tabatibi, në zonën Sidra, në lagjen Daraj në qytetin qendror të Gazës, duke vrarë më shumë se 25 qytetarë dhe duke plagosur dhjetëra”.
Sipas agjencisë, helikopterët shënjestruan gjithashtu zonat veriore të kampit Nuseirat në Rripin qendror të Gazës.
Një numër i palestinezëve u plagosën pasi ushtria izraelite bombardoi "një shkollë që strehonte njerëz të zhvendosur në kampin e ri në Nuseirat", komunikoi WAFA.
Ushtria izraelite ka goditur Rripin e Gazës që nga një sulm ndërkufitar i Hamasit më 7 tetor, i cili vrau afro 1.200 njerëz.
Më shumë se 33.500 palestinezë janë vrarë dhe mbi 76.000 të tjerë janë plagosur në këtë luftë, duke shkaktuar shkatërrim në masë e zhvendosje dhe duke e çuar popullsinë e Gazës prej më shumë se 2 milionë në uri ekstreme.
Ndërkohë, Izraeli akuzohet për gjenocid në Gjykatën Ndërkombëtare të Drejtësisë (GjND), e cila ka urdhëruar Tel Avivin të ndalojë aktet gjenocidale dhe të marrë masa për të garantuar ofrimin e ndihmës humanitare për civilët në Gaza.
