Ministri i Punëve të Jashtme të Türkiyes, Iranit dhe Rusisë, Hakan Fidan, Abbas Araghchi dhe Sergej Llavrov, u takuan në Doha për të diskutuar zhvillimet aktuale në Sirinë e goditur nga lufta.
Shefi i diplomacisë turke, Fidan, bëri të ditur në rrjetin social X se ka nisur takimi ministror në formatin e Astanës për procesin e paqes në Siri, të cilin këto tri vende e kanë nisur më parë në kryeqytetin e Kazakistanit.
Fidan tha se takimi po mbahet në kuadër të Forumit të 22-të Doha, i cili në kryeqytetin e Katarit ka mbledhur rreth 6.000 pjesëmarrës të shquar nga të gjitha anët e botës.
Po ashtu, edhe Ministria e Punëve të Jashtme të Rusisë konfirmoi se takimi në formatin e procesit të Astanës është duke u zhvilluar.
Siria ka qenë arenë e një lufte civile që nga viti 2011, e konfliktet janë intensifikuar përsëri nga fundi i nëntorit, kur grupet kundër regjimit morën kontrollin në Aleppo. Më pas ata morën kontrollin e gjithë Idlibit dhe më vonë edhe në Hama.
Dje, grupet opozitare morën kontrollin në provincën Deraa, në kufi me Jordaninë. Sot, grupet lokale opozitare morën kontrollin në provincën jugore Suwayda.
Ushtria Kombëtare Siriane e opozitës kreu operacionin “Agimi i Lirisë” kundër grupit terrorist PKK/YPG në rrethin Tel Rifaat, duke çliruar këtë zonë nga elementet terroriste.
