Ministrat e jashtëm të Türkiyes dhe Rusisë u takuan për bisedime të mërkurën në Moskë.
Mevlüt Çavuşoğlu dhe Sergey Llavrov zhvilluan një takim me dyer të mbyllura në margjinat e takimit të ministrave të jashtëm të Türkiyes, Rusisë, Iranit dhe regjimit sirian.
“Para Takimit Katërpalësh u takova me Ministrin e Jashtëm Llavrov. Diskutuam zhvillimet në Siri, Kaukaz, Ukrainë dhe marrëveshjen e drithit”, njoftoi Çavuşoğlu në Twitter.
Gjatë takimit katërpalësh, ministrat pritet të shkëmbejnë mendime mbi normalizimin e marrëdhënieve Türkiye-Siri dhe të diskutojnë kundër terrorizmit, procesin politik për t'i dhënë fund luftës në Siri dhe çështjet humanitare duke përfshirë kthimin vullnetar, të sigurt dhe dinjitoz të sirianëve, të cilët u larguan nga vendi i tyre për shkak të luftës.
Dhjetorin e kaluar, ministrat e mbrojtjes dhe shefat e inteligjencës nga Türkiye, Rusia dhe regjimi sirian u takuan në Moskë dhe ranë dakord të vazhdojnë takimet trepalëshe për të siguruar stabilitetin në Siri dhe rajonin më të gjerë. Në bisedime më vonë u përfshi edhe Irani.
Siria është zhytur në një luftë të egër civile që nga fillimi i vitit 2011, kur regjimi i Asadit shtypi protestat pro-demokracisë.
