Sekretari i Përgjithshëm i OKB-së, Antonio Guterres, përshëndeti qeverinë e re në Siri dhe përpjekjet e saj për mbrojtjen e civilëve dhe lejimin e qasjes të ndihmës humanitare.
"Unë mirëpres angazhimin e Qeverisë së Përkohshme për të mbrojtur civilët, duke përfshirë punëtorët humanitarë. Unë mirëpres gjithashtu marrëveshjen e tyre për të dhënë qasje të plotë humanitare nëpër të gjitha pikat kufitare, ndërprerjen e burokracisë mbi lejet dhe vizat për punonjësit humanitarë", tha Guterres në një deklaratë.
Duke cituar vizitën e fundit në Damask të koordinatorit të çështjeve humanitare të OKB-së, Tom Fletcher, Guterres tha se Fletcher ishte takuar me kreun e administratës së re të Sirisë, Ahmed al-Sharaa, si dhe me kryeministrin Mohammed al-Bashir.
Grupi kundër regjimit Hayat Tahrir al-Sham (HTS), i udhëhequr nga Sharaa, është shfaqur si fuqia në pushtet në Siri pas rrëzimit të Bashar Asadit rreth një jave më parë.
Në deklaratë, Guterres përshëndeti gjithashtu marrëveshjen e qeverisë së re siriane për të "siguruar vazhdimësinë e shërbimeve thelbësore të qeverisë, duke përfshirë shëndetin dhe arsimin; dhe për t'u angazhuar në një dialog të vërtetë dhe praktik me komunitetin e gjerë humanitar".
"Teksa populli sirian shfrytëzon mundësinë për të ndërtuar një të ardhme më të mirë, komuniteti ndërkombëtar duhet të mblidhet prapa tyre", tha ai.
Bashar Asadi, udhëheqësi i Sirisë për gati 25 vjet, iku në Rusi pasi grupet kundër regjimit morën kontrollin e Damaskut më 8 dhjetor, duke i dhënë fund regjimit të Partisë Baath, që kishte qenë në pushtet që nga viti 1963.
