Sekretari i Përgjithshëm i OKB-së, Antonio Guterres, të martën bëri thirrje për shmangien e rifillimit të luftimeve në Rripin e Gazës, duke kërkuar nga të gjitha palët ta respektojnë marrëveshjen e armëpushimit dhe të angazhohen në negociata të mëtejshme.
"Duhet të shmangim me çdo kusht rifillimin e luftimeve në Gaza, që do të çonin në një tragjedi të madhe," tha Guterres.
Ai gjithashtu i bëri thirrje Hamasit ta përmbushë lirimin e planifikuar të pengjeve të shtunën e ardhshme.
Guterres theksoi nevojën që "të dyja palët" të mbajnë armëpushimin dhe të rifillojnë "negociata serioze në Doha për fazën e dytë."
Deklaratat e kreut të OKB-së vijnë mes shqetësimeve të rritura për armëpushimin e brishtë, ndërsa ndërmjetësit ndërkombëtarë po punojnë për të siguruar një paqe të qëndrueshme në rajon.
Një armëpushim trefazësh është në fuqi në Gaza që nga 19 janari, duke ndalur sulmin e Izraelit, i cili ka vrarë mbi 48.000 njerëz dhe ka shkatërruar rajonin.
Në fazën e parë, që zgjat deri në fillim të marsit, pritet shkëmbimi i 33 pengjeve izraelite me të burgosur palestinezë, ndërsa këtë javë është planifikuar shkëmbimi i gjashtë.
Në nëntor, Gjykata Ndërkombëtare Penale lëshoi urdhërarreste për kryeministrin izraelit Benjamin Netanyahu dhe ish-ministrin e Mbrojtjes Yoav Gallant për krime lufte në Gaza.
