Kryeministri i Hungarisë, Viktor Orban, tha se Türkiye ka dëshmuar se është aktor i domosdoshëm për sigurimin e paqes që nga fillimi i luftës në Ukrainë dhe tha se presidenti Erdoğan është i vetmi burrë shteti i suksesshëm që ka mundur të bëjë marrëveshjen e drithit në Detin e Zi midis Rusisë dhe Ukrainës.
Në një video që ka shpërndarë nga llogaria e tij në median sociale X, Orban shprehu lëvdata për presidentin Erdoğan me të cilin u takua në kuadër të aktivitetit të shënimit të 75-vjetorit të NATO-s në Uashington të ShBA-së.
Orban, i cili vizitoi Ukrainën dhe më pas Rusinë e Kinën pasi vendi i tij mori mandatin e presidencës së Bashkimit Evropian (BE) dhe i cili i quajti këto kontakte "mision paqeje", vuri në dukje se ai e ka vazhduar këtë mision duke u takuar me presidentin Erdoğan gjatë kontakteve të tij në Uashington.
Orban tha se gjatë takimit dypalësh është diskutuar për luftën në Ukrainë e cila ka arritur një nivel shumë më brutal dhe se është e pashmangshme se duhet një paqe dhe iniciativë paqeje për t'u dhënë fund vuajtjeve atje.
"Erdoğan, lideri i vetëm që ka siguruar marrëveshje me Rusinë dhe Ukrainën"
"Gjatë procesit të luftës turqit u dëshmuan se janë aktor i domosdoshëm për sigurimin e paqes. Presidenti Erdoğan është i vetmi burrë shteti i suksesshëm që ka mundur të bëjë marrëveshjen e drithit në Detin e Zi midis Rusisë dhe Ukrainës. Nga presidenti kërkova të japë mbështetje për misionin e paqes që po bëjmë", tha Orban.
Kryeministri hungarez theksoi se palët ndërluftuese qëndruan në një distancë shumë të largët nga njëra-tjetra, por nëse miqtë e paqes bashkojnë forcat, hapi i ardhshëm së bashku mund të bëhet drejt paqes.
Në kuadër të Samitit të krerëve të shteteve dhe qeverive të NATO-s, presidenti Erdoğan dje u takua me kryeministrin hungarez Orban në Uashington.
