Të paktën 23 palestinezë u vranë në sulmet e kryera nga forcat izraelite në pjesë të ndryshme të Rripit të Gazës mbrëmjen e djeshme pas shpalljes së armëpushimit që do të hyjë në fuqi të dielën.
Agjencia palestineze e lajmeve WAFA raporton se të paktën 18 palestinezë humbën jetën në një sulm të ushtrisë izraelite ndaj shtëpive pranë Unionit të Inxhinierisë në lagjen Sheikh Radwan të Gazës.
Të paktën tre palestinezë u vranë gjithashtu në sulmin në shtëpinë e familjes Nebih në lagjen Ed-Deraj në lindje të qytetit të Gazës.
Dy palestinezë të tjerë u vranë në një sulm izraelit në shtëpinë e familjes Al-Liham në qytetin Khan Younis në Rripin jugor të Gazës.
Kryeministri dhe ministri i Jashtëm i Katarit, Mohammed bin Abdulrahman Al-Thani, njoftoi mbrëmjen e djeshme se një marrëveshje për armëpushimin dhe shkëmbimin e të burgosurve në Gaza është arritur dhe do të hyjë në fuqi të dielën.
Ai tha në një konferencë për shtyp në Doha se faza e parë do të zgjasë 42 ditë dhe do të përfshijë lirimin e 33 pengjeve izraelitë në këmbim të një numri të caktuar të burgosurish palestinezë.
Armëpushimi vjen pas ditës së 467-të të gjenocidit të Izraelit në Gaza, i cili, me mbështetjen e SHBA-së, ka lënë të vdekur më shumë se 156,000 njerëz, shumica prej tyre gra dhe fëmijë.
