ShBA-ja dënon sulmin e fundit me raketa balistike nga Irani kundër Izraelit, tha Pentagoni të martën.
"Irani kreu një sulm të rëndësishëm kundër Izraelit sot, duke lëshuar rreth 200 raketa balistike duke synuar disa vende në Izrael", u tha gazetarëve sekretari i shtypit, gjeneralmajor Pat Ryder.
"Ne i dënojmë këto sulme të pamatura nga Irani dhe i bëjmë thirrje Iranit të ndalojë çdo sulm të mëtejshëm, përfshirë edhe nga forcat e tij prokurë", tha ai.
Gjatë sulmit, tha Ryder, ushtria amerikane u koordinua "nga afër" me ushtrinë izraelite për të ndihmuar në mbrojtjen e Izraelit.
"Shkatërruesit e marinës amerikane të vendosur në rajonin e Lindjes së Mesme mbështetën mbrojtjen e Izraelit duke gjuajtur rreth një duzinë interceptorë kundër raketave iraniane", shtoi ai.
Irani gjuajti qindra raketa balistike drejt Izraelit në mes të tensioneve të rritura midis dy rivalëve rajonalë.
Korpusi i Gardës Revolucionare Islamike (IRCG) tha se sulmi ishte në përgjigje të vrasjeve të liderit të Hamasit Ismail Haniyeh, liderit të Hezbollahut, Hassan Nasrallah dhe komandantit të IRGC-së, Abbas Nilforoshan.
