Turizmi global pothuajse është kthyer në nivelet para pandemisë, sipas raportit të Kombeve të Bashkuara (OKB) për turizmin.
Në raport thuhet se shifrat ishin rikthyer 96 për qind në nivelin e vitit 2019, përpara shpalljes së pandemisë COVID-19.
Pothuajse 790 milionë turistë udhëtuan jashtë vendit në shtatë muajt e parë të këtij viti, që është 11 për qind më shumë se në vitin 2023, sipas të dhënave të fundit nga Barometri Botëror i Turizmit të UNWTO.
Pavarësisht sfidave aktuale ekonomike dhe gjeopolitike, sektori është në rrugën e duhur për rimëkëmbjen e plotë deri në fund të vitit.
Progresi kryesor u arrit në Evropë, e cila arriti në 99 përqind të niveleve para pandemisë dhe Lindjen e Mesme, e cila pa një rritje prej 26 përqind krahasuar me shifrat e 2019-ës.
Azia dhe Paqësori, ende duke u rikuperuar nga një rihapje më e ngadaltë, panë një rikuperim prej 82 për qind, me numra që përmirësohen vazhdimisht ndërsa tregjet rihapen plotësisht.
Sekretari i Përgjithshëm i OKB-së për Turizmin Zurab Pololikashvili theksoi se këto të dhëna janë dëshmi e kërkesës së madhe globale për udhëtime, si dhe efektivitetit të lehtësimit të kufizimeve të vizave dhe përmirësimit të lidhjeve ajrore.
"Turizmi ndërkombëtar është në rrugën e tij për të konsoliduar rimëkëmbjen e plotë nga kriza më e madhe në historinë e sektorit", tha ai.
Të ardhurat nga turizmi gjithashtu po rikuperohen, me vende si Shqipëria dhe Serbia që raportojnë më shumë se dyfishin e të ardhurave të tyre nga turizmi nga viti 2019, përkatësisht 128 dhe 126 përqind. Ata pasohen nga Taxhikistani (85 përqind), Pakistani (76 për qind), Mali i Zi (70 për qind), Maqedonia e Veriut (60 përqind) dhe Portugalia (57 për qind).
Megjithatë, inflacioni i kostos së udhëtimit, pasiguria ekonomike dhe ndryshimet klimatike mbeten sfida që industria të rimëkëmbet plotësisht, shtuan ata.
Duke parë përpara, Indeksi i Besimit të Turizmit të OKB-së parashikon një përfundim pozitiv për vitin 2024, megjithëse ekspertët paralajmërojnë se rritja e çmimeve dhe paqëndrueshmëria e vazhdueshme globale mund të ngadalësojnë rritjen në muajt e fundit të vitit.
