Drejtori i përgjithshëm i Reporterëve pa Kufij (RSF), Thibaut Bruttin, deklaroi se është shqetësuese që Izraeli po përpiqet të portretizojë gazetarët në Rripin e Gazës si "terroristë".
Bruttin foli për AA në Gjenevë, ku mori pjesë në një program lidhur me vrasjet e gazetarëve në Rripin e Gazës, i cili që prej 7 tetorit të vitit të kaluar ka qenë nën sulme intensive izraelite.
Ai theksoi se gazetarët në Gaza përballen me kërcënime jashtëzakonisht shqetësuese.
"Është krejtësisht e pazakontë që një zonë e tillë të jetë e mbyllur për mediat ndërkombëtare. Të gjitha lajmet mbështeten te gazetarët lokalë palestinezë, të cilët, si civilë, janë në rrezik dhe mund të jenë objektiv. Prandaj, jemi shumë të shqetësuar për atë që po ndodh atje," tha Bruttin.
Ai nënvizoi se përgjegjësia kryesore e komunitetit ndërkombëtar është "të ushtrojë presionin e duhur ndaj Izraelit dhe ushtrisë së tij për të ndryshuar politikat e tyre."
Bruttin shtoi se është e qartë që Izraeli nuk ka qëllim të mbrojë gazetarët.
Duke theksuar se Izraeli jo vetëm që nuk i ka mbrojtur gazetarët, Bruttin tha se ka arsye të besohet që një numër i madh prej rreth 140 gazetarësh janë vrarë qëllimisht dhe kanë qenë objektiv i ushtrisë izraelite.
"Si të mos mjaftonte kjo, tani shohim që ushtria izraelite po përpiqet të paraqesë gazetarët palestinezë si terroristë. Prandaj, jemi shumë të shqetësuar për këtë prirje. Kemi marrë përgjigje të pakënaqshme nga ushtria izraelite në të kaluarën, por ata vazhdojnë të përpiqen të na bindin se veprimet e tyre janë në përputhje me standardet ndërkombëtare për mbrojtjen e punonjësve të medias. Tani ata hapur po gënjejnë dhe po përpiqen të portretizojnë gazetarët në Gaza si terroristë," tha Bruttin.
Sipas tij, nëse gazetarët në Rripin e Gazës heshten, do të ketë një problem të madh për raportimin mbi zhvillimet në enklavën palestineze.
Ai vuri në dukje se gazetarët në Gaza janë të rraskapitur dhe përballen me mungesa uji, ushqimi dhe energjie elektrike.
"Gazetarët megjithatë janë të detyruar të raportojnë për konfliktin dhe ata e bëjnë këtë me rrezik të madh," theksoi Bruttin, duke shtuar: "Gaza është një vend i rrezikshëm për gazetarët. Mendoj se kjo është një situatë e paprecedentë. Kemi qenë dëshmitarë të luftërave të mëdha në fillim të shekullit të 21-të. Lufta në Irak ishte një makth për gazetarët. Qindra gazetarë u vranë atje. Ne njohim
natyrën e veçantë të konfliktit në Gaza, por për fat të keq dimë gjithashtu që është tepër e zakonshme që gazetarët lokalë të paguajnë një çmim shumë të lartë në konfliktet që marrin pak vëmendje nga mediat ndërkombëtare."
