Presidenti turk, Recep Tayyip Erdoğan, në takimin me presidentin ukrainas, Volodymyr Zelenskyy, ka bërë të ditur se puna ka filluar për të rigjallëruar iniciativën e drithërave të Detit të Zi.
Erdoğan dhe Zelenskyy u takuan në margjinat e samitit të NATO-s në Uashington për të diskutuar luftën Rusi-Ukrainë, si dhe çështjet rajonale dhe globale.
Presidenti turk homologut të tij ukrainas i tha se Türkiye vazhdon përpjekjet e saj për t’i dhënë fund konfliktit që filloi në muajin shkurt të vitit 2022 “me një paqe të drejtë”.
Erdoğan tha se Ankaraja është e gatshme për çdo iniciativë, përfshirë ndërmjetësimin, për të hedhur bazat për paqen.
Ankaraja vazhdimisht i ka bërë thirrje Kievit dhe Moskës që t’u japin fund luftimeve përmes negociatave.
Türkiye për herë të parë ishte nikoqir i një takimi midis shefave të diplomacisë ruse dhe asaj ukrainase në qytetin mesdhetar Antalya në muajin mars të vitit 2022.
Përpjekjet çuan në marrëveshjen historike të drithërave në vitin 2022, por Moska nuk e zgjati marrëveshjen pas korrikut të vitit 2023, duke përmendur kufizimet në eksportet ruse të drithërave.
Po ashtu presidenti turk, Recep Tayyip Erdoğan ka takuar edhe homologun e tij francez, Emmanuel Macron, me të cilin kanë diskutuar për sulmet izraelite ndaj Palestinës.
Në margjinat e një samiti të NATO-s në Uashington, siç njofton Drejtoria e Komunikimeve e Türkiyes, Erdoğan dhe Macron trajtuan gjithashtu marrëdhëniet dypalëshe dhe çështjet rajonale, duke përfshirë luftën në Ukrainë.
Erdoğan tha se inkurajimi i Izraelit nga vendet perëndimore për armëpushimin në Gaza, ku ka vrarë të paktën 38 mijë palestinezë që nga tetori i kaluar, do të kontribuojë në paqen rajonale dhe globale. Ai kërkoi nga Macron se do të ishte e dobishme për Francën që të ndërmarrë “hapa konkretë” në këtë drejtim.
Duke shprehur rëndësinë e forcimit të marrëdhënieve midis Türkiyes dhe Francës në çdo fushë, Erdoğan tha se rivitalizimi i procesit të anëtarësimit të Türkiyes në BE është i nevojshëm dhe Ankaraja pret të mbështetet në këtë mënyrë.
