Departamenti amerikan i Shtetit ka njoftuar se që para një kohe mbështet publikisht shitjen e avionëve amerikanë F-16 Türkiyes.
Zëdhënësi i Departamentit të Shtetit, Matthew Miller, iu përgjigj pyetjeve të gazetarëve në një konferencë të përditshme shtypi.
Ai theksoi se anëtarësimi i Suedisë në NATO dhe shitja e F-16 janë dy çështje të ndara.
“Tashmë e kemi shpallur publikisht se mbështesim shitjen e F-16-ve Türkiyes dhe këtë e themi edhe në takime private. Megjithatë, sado që nuk e pranojmë, ka një grup anëtarësh të Kongresit që besojnë se duhet të lidhet me çështjen e anëtarësimit në NATO”, tha Miller.
Ai vuri në dukje se Suedia "ndryshoi Kushtetutën e saj, miratoi një ligj të ri, arrestoi të dyshuar për terrorizëm dhe vazhdon hetimet" për të lehtësuar shqetësimet e Türkiyes rreth anëtarësimit të saj në NATO.
Miller shtoi se besojnë se kjo është e mjaftueshme për të zbutur shqetësimet e Türkiyes dhe se besojnë se ka ardhur koha për anëtarësimin e Suedisë në NATO.
“Megjithatë, nuk dua të bëj ndonjë hamendje, përveçse ne besojmë se kjo duhet të ndodhë në të ardhmen shumë të afërt”, tha Miller.
Ai kujtoi se sekretari amerikan i Shtetit, Antony Blinken, ka biseduar tri herë në pesë-gjashtë ditët e fundit me homologun e tij turk, Hakan Fidan.
Miller theksoi se do të vazhdojnë të mbështesin synimet e Türkiyes në rrugën drejt Bashkimit Evropian (BE) dhe se kjo është një çështje midis BE-së dhe Ankarasë.
Biden përshëndet vendimin e Türkiyes për pranimin e Suedisë në NATO
Presidenti amerikan Joe Biden mirëpriti angazhimin e presidentit turk Recep Tayyip Erdoğan për të dërguar në parlament protokollin për anëtarësimin e Suedisë në NATO.
“Jam gati të punoj me presidentin Erdoğan dhe Türkiyen për të përmirësuar mbrojtjen dhe parandalimin në rajonin euroatlantik”, tha Biden në një deklaratë.
Ai shtoi se përshëndet veçanërisht vendimin e Türkiyes për të dërguar për ratifikim në parlamentin e shtetit protokollin për pranimin e Suedisë në NATO.
Biden tha se me padurim pret të shohë Suedinë si aleatin e 32-të të NATO-s.
Sekretari i Përgjithshëm i NATO-s Jens Stoltenberg tha më herët se do të krijohej një mekanizëm dypalësh sigurie midis Türkiyes dhe Suedisë dhe se do të emërohej koordinatori i parë special i NATO-s kundër terrorizmit.
Stoltenberg po u përgjigjej pyetjeve të gazetarëve përpara samitit të NATO-s në Vilnius, kryeqyteti i Lituanisë, pas një takimi me presidentin turk Recep Tayyip Erdoğan dhe kryeministrin suedez Ulf Kristersson në lidhje me aplikimin e Suedisë për anëtarësim në NATO.
"Kam kënaqësinë të njoftoj se Erdoğan ka rënë dakord të dërgojë protokollin e pranimit të Suedisë në parlamentin turk sa më shpejt të jetë e mundur dhe të punojë ngushtë me parlamentin për ratifikimin e tij", tha Stoltenberg.
Në takimin e liderëve të Türkiyes, Suedisë dhe NATO-s u tha gjithashtu se Suedia do të mbështesë anëtarësimin e Türkiyes në BE, duke përfshirë përditësimin e Unionit Doganor dhe liberalizimin e regjimit të vizave.
Gjatë samitit dyditor të NATO-s më 11 dhe 12 korrik do të diskutohen lufta Rusi-Ukrainë, sfidat e NATO-s dhe hapat për të forcuar mbrojtjen dhe parandalimin. Në agjendë do të jetë edhe kandidatura e Suedisë për anëtarësim në NATO.
