Shtëpia e Bardhë tha të premten se "nuk ishte në dijeni" për ndonjë njoftim paraprak nga Izraeli përpara se të kryente sulmin në Bejrut të premten në mes të tensioneve në rritje me Hezbollahun libanez.
"Unë sigurisht nuk jam në dijeni të ndonjë njoftimi paraprak për këto sulme. Dhe kjo, natyrisht, siç e dini, nuk është atipike," u tha gazetarëve zëdhënësi i Këshillit të Sigurisë Kombëtare, John Kirby.
Autoritetet libaneze thanë se të paktën nëntë persona u vranë dhe 59 u plagosën kur Izraeli nisi një sulm në një ndërtesë në Dahiyeh, një periferi jugore të kryeqytetit libanez Bejrut.
Radioja e ushtrisë izraelite citoi një zyrtar të paidentifikuar të sigurisë të thoshte se objektivi i sulmit ajror të sotëm në Bejrut ishte një nga komandantët e Hezbollahut, Ibrahim Aqil.
Kirby mohoi çdo përfshirje të ShBA-së në sulmin në Bejrut dhe shpërthimet e mijëra pajisjeve të komunikimit në të gjithë Libanin që vranë 37 njerëz dhe plagosën më shumë se 3.250 të martën dhe të mërkurën.
Kirby argumentoi se kishte ende kohë për të parandaluar përshkallëzimin e mëtejshëm, duke thënë se Shtetet e Bashkuara ishin "të angazhuara në diplomaci intensive për këtë qëllim".
"Ne nuk duam që një front i dytë në këtë luftë të hapet në kufirin me Libanin dhe gjithçka që bëjmë do të përfshihet në përpjekjen për të parandaluar atë rezultat. Siç e kam thënë më parë, nuk ka asnjë arsye që një konflikt i zgjatur ushtarak në Liban duhet të jetë i pashmangshëm”, tha Kirby. Duke iu përgjigjur pyetjes së Anadolu, ai shtoi:
“Ka ende kohë dhe hapësirë që diplomacia të funksionojë dhe ne do të vazhdojmë të përpiqemi dhe jemi këtu”.
