Stoltenberg: Shqetësimet e Türkiye-s janë legjitime dhe duhet të adresohen

Sekretari i përgjithshëm i NATO-s, Jens Stoltenberg, ka deklaruar se shqetësimet e Türkiye-s për aplikimet e vendeve nordike për anëtarësim në aleancë janë legjitime dhe duhet të adresohen.

Duke folur në një konferencë të përbashkët për media me kryeministren suedeze, Magdalena Andersson, përpara samitit të NATO-s në Madrid, shefi i NATO-s tha se “asnjë aleat nuk ka vuajtur më shumë nga duart e terroristëve, përfshirë sulmet e rënda nga grupi terrorist PKK”.
Stoltenberg tha se aleanca duhet të dyfishojë përpjekjet e saj në luftën kundër terrorizmit dhe njoftoi se një seancë e posaçme kushtuar përpjekjeve kundër terrorizmit të NATO-s do të mblidhet gjatë samitit në kryeqytetin spanjoll.
“Tani po punojmë së bashku për një marrëveshje midis Suedisë, Finlandës dhe aleatit tonë Türkiye-s për të adresuar më tej shqetësimet e sigurisë, përfshirë eksportet e armëve dhe luftën kundër terrorizmit”, tha Stoltenberg.
Muajin e kaluar, Suedia dhe Finlanda aplikuan zyrtarisht për t’u anëtarësuar në NATO, vendim që u nxit nga lufta e Rusisë kundër Ukrainës, e cila filloi më 24 shkurt.
Por Türkiye, një anëtare e kahershme e aleancës, ka shprehur kundërshtime ndaj aplikimeve për anëtarësim, duke kritikuar të dy vendet për tolerimin dhe madje edhe për mbështetjen e grupeve terroriste.
Andersson, nga ana e saj, tha se “qëndrimi ynë në lidhje me PKK-në është kristal i qartë” dhe se kjo organizatë është e “listuar si një organizatë terroriste nga BE-ja dhe konsiderohet si e tillë edhe nga Suedia”.
“Suedia dënon terrorizmin në termat më të ashpër të mundshëm. Ne jemi të përkushtuar pa mëdyshje për luftën kundër terroristëve në të gjitha format dhe manifestimet e saj”, u shpreh Andersson.
“Suedia do të kontribuojë në sigurinë e NATO-s në tërësi, përfshirë për Türkiye-n, në frymën e solidaritetit”, shtoi ajo.
Në fushatën e saj terroriste mbi 35-vjeçare kundër Türkiye-s, PKK-ja e listuar si një organizatë terroriste nga Türkiye, SHBA-ja dhe BE-ja, ka qenë përgjegjëse për vdekjen e 40 mijë njerëzve.
Zyrtarët suedezë, finlandezë dhe turq sot u takuan në Bruksel, duke shprehur “shpresë të fortë se dialogu mund të përfundojë me sukses në të ardhmen e afërt”.