Një civil u vra dhe dy të tjerë u plagosën në një sulm të grupit terrorist PKK/YPG në verilindje të Sirisë, thanë të hënën burimet lokale.
Nga qyteti i pushtuar i Ayn Isa, në veri të provincës Raqqa të Sirisë, terroristët e PKK/YPG-së nisën një sulm në fshatin Salihiyah, në jug të qytetit Tel Abyad, me armë të rënda, thanë burimet në kushte anonimiteti.
Sipas raporteve fillestare, një civil u vra dhe dy të tjerë u plagosën në sulm, shtuan ata.
Qyteti u pastrua nga të gjithë elementët terroristë në tetor 2019, falë operacionit "Pranvera e Paqes" nga Türkiye.
Terroristët e PKK/YPG-së, të cilët tentojnë të hyjnë shpesh në zonën e operacionit, synojnë shtëpitë e civilëve me sulme me raketa.
Që nga viti 2016, Ankaraja ka nisur një trio operacionesh të suksesshme antiterroriste përtej kufirit të saj në veri të Sirisë për të parandaluar formimin e një korridori terrorist dhe për të mundësuar vendosjen paqësore të banorëve: Mburoja e Eufratit (2016), Dega e Ullirit (2018) dhe Pranvera e Paqes (2019).
Në fushatën e saj terroriste më shumë se 35-vjeçare kundër Türkiyes, PKK-ja – e listuar si organizatë terroriste nga Türkiye, ShBA-ja dhe BE-ja – ka qenë përgjegjëse për vdekjen e mbi 40.000 njerëzve, duke përfshirë gra, fëmijë dhe foshnja. YPG-ja është dega siriane e PKK-së.
