Kreu i Drejtorisë së Komunikimeve të Presidencës së Türkiyes, Fahrettin Altun, ka theksuar rëndësinë e forcimit të lidhjeve me Greqinë përmes mirëkuptimit të ndërsjellë, bashkëpunimit ekonomik dhe shkëmbimit kulturor.
"Prosperiteti i brezave të ardhshëm varet nga forcimi i marrëdhënieve dypalëshe," tha Altun të dielën në një intervistë me gazetën greke Ta Nea, duke trajtuar çështjet rajonale kyç dhe mosmarrëveshjet e pazgjidhura.
“Promovimi i mirëkuptimit të ndërsjellë, zgjerimi i mundësive tregtare, thellimi i lidhjeve mes njerëzve dhe përpjekja për prosperitet të përbashkët do të përfitojnë të gjithë”.
"Duke u dhënë përparësi këtyre qëllimeve, ne mund të sigurojmë që ata që dëshirojnë të prishin përparimin dhe të bllokojnë rrugën drejt bashkëpunimit dhe paqes do të mënjanohen", shtoi Altun.
Përsa i përket promovimit të bashkëpunimit kulturor, Altun theksoi mbështetjen e Ankarasë për kthimin e Marmarave të Partenonit në Greqi dhe kërkoi respekt të ndërsjellë për çështje të ndjeshme si Deti Egje dhe minoriteti turk në Greqi.
Ai theksoi se “do të ishte e dobishme që opinioni grek të kuptojë se Egjeu nuk është një liqen grek dhe se Türkiye, me bregdetin e saj të gjatë, e ndan këtë det dhe ka të drejta legjitime dhe interesa jetike në rajon,” duke theksuar nevojën për t'i zgjidhur mosmarrëveshjet në mënyrë paqësore në kuadër të ligjit ndërkombëtar.
Në lidhje me minoritetin turk në Greqi, zyrtari turk shtoi gjithashtu:
“Minoriteti turk kërkon njohjen zyrtare të liderëve të tij fetarë të zgjedhur dhe lirinë për të shprehur identitetin e tij etnik pa frikë nga pasojat ligjore ose administrative, ashtu siç gëzon lirinë minoriteti grek në Türkiye”.
Thirrje për realizëm për Qipron
Duke diskutuar për ishullin e Qipros, Altun kritikoi dështimin prej dekadash të negociatave të udhëhequra nga OKB-ja për një "federatë bizonale, bikomunale".
"Është koha për ta pranuar realitetin në terren: ekzistencën e dy popujve të veçantë dhe dy shteteve të veçanta në ishullin e Qipros. As turqit qipriotë dhe as Türkiye nuk janë të gatshëm të humbin edhe 60 vjet të tjera."
Duke parë përpara Këshillit të 6-të të Bashkëpunimit të Nivelit të Lartë në Ankara vitin e ardhshëm, Altun shprehu optimizëm për zhvillimin e mëtejshëm të lidhjeve dypalëshe, duke vënë në dukje se këto takime mbulojnë një gamë të gjerë temash dhe përfshijnë angazhim të nivelit të lartë nga të dyja vendet.
"Kur bëhet fjalë për fqinjët si Türkiye dhe Greqia, kjo natyrisht duhet të jetë normë dhe jo një dukuri e jashtëzakonshme", vuri në dukje ai.
Bashkëpunim i pakufizuar me Greqinë
Altun vlerësoi gjithashtu suksesin e kandidaturave të përbashkëta të Türkiyes dhe Greqisë për role brenda Organizatës për Siguri dhe Bashkëpunim në Evropë, duke e theksuar këtë si provë të potencialit të tyre për bashkëpunim në platformat ndërkombëtare.
"Ndërkohë që kemi dallime të pazgjidhura në disa çështje, sfidat që përballen të dyja vendet, si dhe interesat tanë në rajon dhe përtej tij, kryesisht përputhen”, potencoi Altun.
"Bashkëpunimi na lejon ta zhvendosim fokusin tonë nga konfliktet në objektiva të përbashkëta".
Altun përfundoi me një vizion shpresëdhënës për marrëdhëniet dypalëshe: “Kur bëhet fjalë për thellimin e marrëdhënieve me Greqinë, për ne nuk ka kufij”.
