Ministri i Jashtëm i Türkiyes Hakan Fidan ka zhvilluar një bisedë telefonike me homologun e tij iranian Hossein Amirabdollahian pas sulmit me dron të Iranit ndaj Izraelit, gjatë të cilit Teherani lëshoi 300 dronë dhe raketa.
Fidan theksoi dëshirën e Türkiye për të shmangur përshkallëzimin e mëtejshëm në rajon pas sulmit hakmarrës kundër Izraelit të shtunën vonë, si dhe përcolli se Ankaraja dëshiron që veprimet që mund të përshkallëzojnë tensionin të pushojnë, njoftuan burimet diplomatike.
Ministri i Jashtëm iranian Amirabdollahian tha se operacioni hakmarrës kundër Izraelit ka përfunduar dhe se Irani nuk ka ndërmend të nisë një operacion të ri nëse nuk provokohet.
Amirabdollahian paralajmëroi se në rast të një sulmi tjetër ndaj Iranit, përgjigjja do të jetë më e fortë.
Hakmarrja iraniane u shkaktua nga një sulm ajror të Izraelit në Siri, i cili mori jetën e gjeneralëve të Gardës Revolucionare të Iranit.
Breshëria e dronëve dhe raketave shënon rastin e parë të Iranit që nis një sulm direkt nga territori i tij kundër Izraelit.
Sulmi ka ngjallur shqetësime në mesin e atyre që kanë frikë se reagimi i mundshëm i Izraelit kundër Iranit mund të shkaktojë një tjetër përshkallëzim në rajonin tashmë të paqëndrueshëm.
