I dërguari i Türkiyes në OKB, Ahmet Yildiz, i kërkoi administratës së re siriane të marrë kontrollin e kampeve për të zhvendosur dhe të burgosurve të terrorizmit të DAESh/ISIS-it.
"Për të pasur një Siri të paqtë, të pavarur dhe të bashkuar politikisht, nuk ka vend për Daesh-in apo PKK/YPG/SDF-në", tha Yildiz për Këshillin e Sigurimit. Ai shtoi: "Türkiye e vlerëson vendosmërinë e administratës së re për të luftuar terrorizmin dhe është e gatshme të bashkëpunojë me Sirinë në këtë drejtim."
Duke kërkuar përfundimin e shfrytëzimit të burimeve natyrore të Sirisë, veçanërisht naftës dhe gazit, Yildiz tha: "Këto burime duhet të kthehen te pronarët e tyre të ligjshëm, populli sirian, për t'u përdorur në ndërtimin e një Sirie të begatë."
Yildiz theksoi se elementët e huaj në grupet terroriste duhet të largohen nga Siria dhe "pjesa tjetër e elementëve të YPG/PKK-së duhet të dorëzojnë të gjitha armët e tyre."
"Organizatat terroriste në lindje të Sirisë përdorin kampet dhe burgjet e Daesh për propagandë për të justifikuar ekzistencën e tyre," tha ai, duke shtuar se "është koha për të transferuar sigurinë e këtyre kampeve dhe burgjeve te administrata e re."
Ai shprehu gatishmërinë e Türkiyes për të mbështetur Sirinë në marrjen e kontrollit të kampeve dhe burgjeve dhe kërkoi që komuniteti ndërkombëtar të ndihmojë në riatdhesimin e të burgosurve të DAESh-it.
PKK-ja, që ka zhvilluar një fushatë terroriste 40-vjeçare kundër Türkiyes, është e klasifikuar si organizatë terroriste nga Türkiye, ShBA-ja dhe BE-ja. YPG-ja është degë siriane e PKK-së.
Që nga rënia e regjimit të Bashar al-Assad në dhjetor në Siri, PKK/YPG-ja ka tentuar ta shfrytëzojë pasigurinë rajonale për të krijuar një "korridor terrori" përgjatë kufirit me Türkiyen.
