Një zjarr ka shpërthyer në një hotel në ndërtim në qytetin Alanya të provincës Antalya në jug të Türkiyes, e cila po përshtatej nga ndërtesë banimi në hotel.
Katër punëtorë që kishin mbetur të bllokuar në katet e sipërme u shpëtuan nga ekipet intervenuese.
Ekipet e zjarrfikësve, emergjencës, Agjencisë së Menaxhimit të Fatkeqësive dhe Emergjencave (AFAD) dhe policisë u dërguan menjëherë në vendngjarje pas denoncimit.
Ekipet përdorën vinç për t'i shpëtuar punëtorët e bllokuar në katet e larta të ndërtesës dhjetëkatëshe.
Zyrtarët lokalë thonë se nga zjarri janë djegur materiale ndërtimi dhe mobilie të vjetra.
“Në ndërtesë ndodheshin katër persona, të cilët u shpëtuan. Tani nuk është më askush brenda. Ekipet janë duke vazhduar ndërhyrjen për shuarjen e zjarrit. Kjo ndërtesë është përdorur më parë si hotel dhe banesë. Tani po përshtatej si hotel dhe po bëheshin riparime”, tha Fatih Ürkmezer, një zyrtar i lartë pushtetit lokal.
Ndërkaq, kryetari i Bashkisë së Alanyas, Osman Tarık Özçelik, tha se, sipas të dhënave preliminare, zjarri filloi si pasojë e shkëndijave të saldimit gjatë punimeve, që ranë mbi shtretër prej sfungjeri.
“Kjo është një hipotezë preliminare dhe jo përfundimtare”, tha ai.
