Kryetari i Parlamentit të Ukrainës, Ruslan Stefanchuk, tha se ministri i Jashtëm Dmytro Kuleba i ka paraqitur parlamentit kërkesën e tij për dorëheqje.
Në një deklaratë në rrjetet sociale, Stefanchuk njoftoi se kanë marrë një letër dorëheqjeje nga ministri Kuleba dhe bëri të ditur se dorëheqja do të vlerësohet në një nga seancat e ardhshme të asamblesë së përgjithshme.
Më vonë, Stefanchuk deklaroi se zëvendëskryeministrja ukrainase dhe ministrja e Riintegrimit të Territoreve të Pushtuara, Irina Vereshchuk, si dhe zëvendëskryeministrja për Integrimin Evropian dhe Euro-Atlantik, Olha Stefanishina, gjithashtu dorëzuan në parlament kërkesat e tyre për dorëheqje.
Dje, ministri ukrainas i Industrive Strategjike Oleksandr Kamyshin, ministri i Drejtësisë Denis Malyushka, ministri i Mbrojtjes së Mjedisit dhe i Burimeve Natyrore Ruslan Strelets dhe presidenti i Fondit të Pronës Shtetërore të Ukrainës, Vitali Koval, parashtruan në parlament dorëheqjet e tyre.
