Kryetarja e UNICEF-it, Catherine Russell, të enjten paralajmëroi për “plagët e rënda fizike dhe shenjat e thella emocionale” që lufta në Liban po u shkakton fëmijëve.
Russell theksoi në një deklaratë se “166 fëmijë janë vrarë që nga tetori 2023, ndërsa të paktën 1.168 janë plagosur.”
Ajo nënvizoi nevojën urgjente për paqe, duke paralajmëruar se “shërimi i vërtetë mund të fillojë vetëm kur dhuna përfundon.”
Të paktën një fëmijë është vrarë dhe 10 janë plagosur çdo ditë që nga fillimi i tetorit, sipas deklaratës.
“Fëmijët në të gjithë Libanin po shfaqin shenja alarmante të shqetësimit emocional, sjelljes dhe stresit fizik,” tha ajo.
Shumë fëmijë në Liban shfaqin shenja të shqetësimit akut, duke përfshirë “ankthin nga ndarja, frikën e humbjes, tërheqjen, agresionin dhe vështirësi në përqendrim,” tha Russell, e cila përmendi se raportet për makthe, dhimbje koke dhe humbje oreksi janë të zakonshme për fëmijët e prekur.
“Lufta shkatërron mjediset e sigurta dhe mbështetëse që fëmijët kanë nevojë,” tha ajo, duke paralajmëruar se “periudhat e zgjatura të stresit traumatik,” si dhe “rreziqet e rënda shëndetësore dhe psikologjike” mund të zgjasin gjithë jetën.
Deklarata rikonfirmoi se UNICEF-i ka ofruar mbështetje psikologjike emergjente për më shumë se 9.600 fëmijë dhe kujdestarë në Liban që nga fundi i shtatorit.
Russell theksoi se rikuperimi i qëndrueshëm kërkon një “armëpushim të menjëhershëm në mënyrë që (fëmijët) të mund të kenë qasje të sigurt në shërbimet esenciale dhe të fillojnë të rikuperohen nga trauma e luftës.”
